MONA icintu ububi icilecitika! Yesu balemwipaya. Nabamubika pa cimuti. Nabamupoopela imisomali mu minwe na ku molu. Cinshi bacitiile icintu cabipa ifi kuli Yesu?

Ni co abantu bamo balimupatile. Bushe walibeshiba aba bantu? Umo pali bena ni malaika wabipa, Satana Kaseebanya. E walengele Adamu na Efa ukukanaumfwila Yehova. Kabili Satana wine e walengele abalwani ba kwa Yesu ukucita ici cintu icabipa.

Na lintu Yesu tabalamupoopela pa cimuti, abalwani bakwe balicitile ifintu ifibi sana kuli ena. Bushe uleibukisha ilyo baile mu Getsemane ku kumwikata? Bushe balya abalwani bakwe bali ni bani? Ni bashimapepo. Natulande pa fyakonkelepo.

Ilyo bashimapepo basendele Yesu, abatumwa bakwe balibutwike. Bashile Yesu eka na balwani bakwe pantu balyumfwile umwenso. Lelo abatumwa bakwe babili, Petro na Yohane tabaile ukutali sana. Balekonka mu numa pa kuti bamone ifyalacitika kuli Yesu.

Bashimapepo batwele Yesu kuli Anasi, uwali shimapepo mukalamba kale. Abantu tabakokweleko kuli Anasi. Bafumishe Yesu kuli Anasi no kumutwala kuli Kayafa, uwali shimapepo mukalamba pali ilya nshita. Bashimapepo abengi balilongene pa ng’anda yakwe.

Batendeke ukulubulwisha Yesu pa ng’anda ya kwa Kayafa pene. Abantu abengi batendeke ukubepesha Yesu. Bashimapepo bonse batile: ‘Yesu afwile ukufwa.’ Lyena bamufwishile amate pa menso, no kumuuma amakofi.

Ilyo ifi fyonse fyalecitika, Petro ali mu lubansa lwa ng’anda. Kwalitalele sana, e ico abantu balikoseshe umulilo. Ilyo baleonta umulilo, umukashana umo umusha aloleshe Petro no kulanda ati: ‘No yu na o ali na Yesu.’

Petro ayaswike ati: ‘Awe nshali nankwe!’

Abantu baebele Petro imiku itatu ukuti ali na Yesu. Lelo Petro alikeene imiku itatu yonse. Ilyo Petro akeene umuku wa butatu, Yesu alipilibwike no kumulolesha. Petro alyumfwile ububi sana pa kukaana Yesu, kabili alifuminepo no kulila sana.

Ilyo akasuba katendeke fye ukutula pali Cisano, bashimapepo basendele Yesu ku cikuulwa icikalamba ico balekumaninamo, ico baleita ati Sanhedrini. Uku e ko balanshanishishe ifyo bali no kucita kuli Yesu. Bamutwele kuli Ponti Pilato, kateka wa citungu ca Yudea.

Bashimapepo baebele Pilato abati: ‘Uyu muntu mubi sana. Afwile fye ukufwa.’ Pa numa ya kwipusha Yesu ifipusho, Pilato atile: ‘Nshisangile icibi nangu cimo ico uyu muntu acitile.’ Lyena Pilato atwele Yesu kuli Herode Antipa. Herode ali ni kateka mu Galili, lelo aleikala mu Yerusalemu. Herode na o tasangile icibi icili conse ico Yesu acitile, e ico amubwekeshe kuli Pilato.

Pilato alefwaya ukukakula Yesu. Lelo abalwani ba kwa Yesu balefwaya bakakule umuntu umbi. Uyu muntu ni Baraba uwali kabolala. Pa kati ka kasuba, Pilato afumishe Yesu pa nse no kweba abantu ati: ‘Moneni imfumu Yenu!’ Lelo bashimapepo babilikishe ati: ‘Mufumyeni apa! Mwipayeni! Mwipayeni!’ E ico Pilato akakwile Baraba, lelo batwele Yesu mu kumwipaya.

Pali Cisano akasuba, Yesu balimupoopele pa cimuti pamo ne fipondo fibili. Cimo cali ku kulyo e lyo cimbi cali ku kuso. Ifi ifipondo tafilipo pa cikope. Ilyo Yesu ali mupepi no kufwa, icipondo cimo camwebele ati: ‘Mukanjibukishe nga mwaisa mu bufumu bwenu.’ Yesu ayaswike ati: ‘Ndekweba icine cine nati, ukaba na ine mu Paradaise.’

Bushe ubu te bulayo ubusuma? Bushe wali-ishiba paradaise iyo Yesu alelandapo? Bushe paradaise Lesa apangile pa kutampa yali kwi? Yali pano isonde. Kanshi ilyo Yesu akatendeka ukuteka mu muulu, akabuusha ulya muntu ku bafwa pa kuti akekale mu Paradaise pano isonde. Bushe taumfwile bwino pali ubu bulayo?