!YU LUK! Wan samting we i nogud tumas i hapen. Jisas i ded. Ol man oli nilim hem long pos. Oli nilim ol han mo leg blong hem. ?From wanem oli mekem samting ya?

Hemia from we, sam man oli no laekem Jisas nating. ?Yu save hu ya ol man ya? Wan long olgeta, hemia rabis enjel ya Setan. Hem nao we i pulum Adam mo Iv blong tufala i brekem loa blong Jeova. Mo Setan bakegen we i pulum ol enemi blong Jisas blong mekem samting ya we i nogud tumas long hem.

Bifo we ol enemi blong Jisas oli nilim hem long pos, oli mekem ol rabis samting long hem. Tingbaot we oli kam long garen blong Getsemane blong holem hem. ?Hu ya ol enemi ya? Hemia ol lida blong skul. Ale, bambae yumi luk wanem i hapen biaen.

Taem ol lida blong skul oli holem Jisas, ol aposol blong hem oli ronwe. Oli livim Jisas i stap hem wan wetem ol enemi blong hem, from we oli fraet. Be tufala aposol ya, Pita mo Jon, tufala i no go longwe tumas long Jisas. Tufala i biaen long hem blong luk wanem bambae i hapen long hem.

Ol pris oli tekem Jisas i go long olfala man ya Anas, we hem i hae pris bifo finis. Be bigfala hip blong ol man ya oli no stap longtaem long haos blong Anas. Oli aot long ples ya, oli tekem Jisas i go long haos blong Kaeafas, we hem i hae pris naoia. Plante lida blong skul oli stap finis long haos blong hem.

Oli mekem kot long haos blong Kaeafas. Oli karem sam man oli kam blong oli talemaot ol giaman tok agensem Jisas. Nao ol lida blong skul oli talem se: ‘Jisas i mas ded ya.’ Oli spet long fes blong hem, mo oli faetem hem.

Taem ol samting ya i stap gohed, Pita i stap sidaon long yad blong haos ya. Long naet ya, ples i kolkol, ale ol man oli mekem wan faea mo oli sidaon raon long hem. Nao wan haosgel i luk Pita, mo i talem se: ‘!Olgeta! !Man ya tu i stap biaen long Jisas!’

Pita i talem se: ‘Sore, mi mi no save man ya.’

Oli talem tri taem se Pita i bin folem Jisas. Be tri taem Pita i talem bakegen se tok ya i no tru. Long namba tri taem we Pita i talem samting ya, Jisas i tanraon, i lukluk stret long Pita. Nao Pita i harem nogud tumas we hem i bin giaman olsemia, ale hem i gowe, mo i krae we i krae.

Long Fraede moning, taem i brok delaet, ol pris oli tekem Jisas i go long bigfala haos we Kaonsel ya Sanhedrin i stap miting long hem. Long ples ya, oli tokbaot wanem samting bambae oli mekem long Jisas. Biaen, oli tekem Jisas i go long Paelat, we i hed gavman blong ples ya Judia.

Ol pris oli talem long Paelet se: ‘Man ya i wan rabis man. Hem i mas ded.’ Paelet i askem plante kwestin long Jisas, nao hem i talem se: ‘Mi mi no faenem se man ya i brekem loa.’ Nao Paelet i sanem Jisas i go long Herod Antipas. Herod i hed gavman blong Galili, be long taem ya, hem i stap long Jerusalem. Be Herod tu i no faenem wan poen long Jisas, ale hem i sanem hem i gobak long Paelet.

Paelet i wantem letem Jisas i gofri. Be ol enemi blong Jisas oli wantem se Paelet i letem wan narafala prisena i gofri, i no Jisas. Narafala prisena ya, hem i wan stilman, nem blong hem Barabas. Samwe long medel dei, Paelet i tekem Jisas i go afsaed. Nao hem i talem long ol man se: ‘!Yufala i luk! !Hemia king blong yufala ya!’ Be ol jif pris oli singaot strong se: ‘!Tekemaot hem! !Nilim hem long pos! !Kilim hem i ded!’ Ale, Paelet i letem Barabas i gofri, mo oli tekem Jisas i go blong oli nilim hem long pos.

Long Fraede aftenun, oli nilim Jisas long pos. Saedsaed long Jisas, i gat tu man blong brekem loa we oli nilim tufala long pos tu, blong tufala i ded. Yu no save luk tufala long pija ya. Jes bifo we Jisas i pulum laswan win blong hem, wan long tufala ya i askem long hem se: ‘Jisas, Taem we yu yu kam king, plis yu tingbaot mi bakegen.’ Jisas i ansa long hem se: ‘Mi mi promes long yu se bambae yu stap wetem mi long Paradaes.’

Hemia wan nambawan promes. ?Yu yu save wanem paradaes we Jisas i stap tokbaot? ?Faswan paradaes we God i wokem, hem i stap wea? Yes, paradaes ya i stap long wol. Taem Jisas i rul olsem king long heven, bambae hem i mekem man ya i laef bakegen long niufala Paradaes long wol ya. ?Yu yu glad long samting ya?

Matiu 26:57-75; 27:1-50; Luk 22:54-71; 23:1-49; Jon 18:12-40; 19:1-30.