Abahüdaguni 101

Lafarún Hesusu

ARIHABEI lanarime katei wuribati le asuseredubei! Háfaruñein Hesusu hilagubei. Dibiñu liña luagu aban wagabu. Anihein gürabu lurageirugu lúhabu luma lugudi. Kaba hamuga san uagu labusenra aban gürigia ladügüni le?

Ladüga iyereegu lan Hesusu houn fiú gürigia. Subuditi bun kátaña lan? Satanási le mafia aban hádangiñe ligía aban ánheli salufuriti. Ligía adügübei lun maganbadi hamá Adán tuma Ewa lun Heowá. Ligía giñe adügübei lun hadügüni láganiñu Hesusu lanarime figóu le.

Íbini lubaragiñe hadibiragüdüni luagu wagabu, adügatiñu láganiñu Hesusu katei burí wuribati lun. Haritaguabagili ñüdün hamá lidan fuluri-agei Hetüsemaní aba hanügüni? Kátaña meha san áganiñu hagía? Anha, ha meha alidihabalin relihión lidan dan ligía. Ariha waméi ka lan asuseredubei lárigiñe.

Dan le hanügünbalin alidihatiña relihión Hesusu, aba hanurahan apostolugu. Aba halouchun, ábati hígiruni labuguarügü hama láganiñu. Gama lumoun madiseduntiñu apostolugu Huan luma Féduru. Aba houdin hárigi hárigi lun harihini kaba lan asusereda lun Hesusu.

Aba hanügüni fádirigu Hesusu lun weiriei Anasi, fádiri le íñutimabei luagu aban dan. Meredetiña saragu gürigia hagía bandi dan ñein. Lárigiñe aba hanügüni Hesusu lúbiñoun Gaifasi, le hábuti fádirigu guentó. Gíbetiñu hábutigu fádirigu ya.

Anihein aban aguseruni ya lúbiñe Gaifasi. Aba hanügün fiú wügüriña lun heyeehan luagu Hesusu. Sun alidihatiña relihión aba hariñagun: ‘Mosu lafarún Hesusu hilagubei.’ Ábati hásueraguni ligibu Hesusu, ani bulesei haméi.

Lidan nihán lan sun katei le asusereda, bürürüruguñein Féduru. Diligati guñoun ligía, ábati hébedun gürigia watu. Lidan añaha lan abacharagua laru watu, aba tarihini aban eseriwidutu Féduru aba tariñagun: ‘Lúmañein buga giñe Hesusu wügüri le.’

‘Uá, mama lúmañadina!’ Liña lóunabun Féduru.

Ǘrüwa wéiyaasu hariñagun gürigia lun Féduru luagu lúmañein lan buga Hesusu. Ani aba burí leyeedagun. Lidan lǘrüwan wéiyaasu, aba ladigiragun Hesusu luagun. Aba lírudun Féduru ladüga leyeehan, aba lidin ayahuaha.

Dan le láfuridunbei Weyu wandaradi binaafin, aba hanügüni fádirigu Hesusu lidoun óunwenbu fulasu le ñein lubéi hadamuridagua, lasali lánina Sanedrín o liñun-agei lúrudu. Ñein hadimureha luagu kaba lan hadüga lau Hesusu. Aba hanügüni lun Ponsiu Pilatu, le gumadan Hudea.

‘Wuribati wügüri le,’ haña lun Pilatu. ‘Mosu lafarún hilagubei.’ Lárigiñebei lálügüdaguni Pilatu Hesusu, aba lariñagun: ‘Marihintina luagu adüga lan würibati.’ Ábati ladügün Pilatu lun hanügüni lun Erodesi Antipasi, le gumadan Galiléa, ladüga ñeinñein Erodesi Herusalén. Marihinti giñe Erodesi luagu adüga lan Hesusu somu wuribati, ábati lagiribudagüdüni lun Pilatu.

Busenti Pilatu lígiruni Hesusu lun lidin. Ánhañati laganiñu Hesusu busentiñu lun lígiragüdün Pilatu aban adaürǘti ladüga láfarahan gíriti Barawási. Chülümémeli amidi dan le lasagaruni Pilatu Hesusu bóugudin. Aba lariñagun houn gürigia: ‘Ariha huméi hurúeite!’ Gama lumoun aba hagúarahan hábuti fádirigu: ‘Gidabei ñéingiñe! Áfarabei!’ Ítara liña lerederun Barawási líbüre, ánheinti Hesusu aba hanügüni lun háfaruni.

Tenpüranu wándaradi rábounweyu aba hádaraguni luagu wagabu. Añahein biama wügüriña wuribatiña lóubagiñe Hesusu dibiñu haña giñe luagu wagabu lun hóunwegun, aban luéigiñe kada oubaü íbini marihín hamá lidan dibuhu. Murusun dan lubaragiñe lounwen Hesusu, aba lariñagun aban hádangiñe lun: ‘Haritaguabátia nuagun danme le lagumeserun barúeihan.’ Aba lóunabun Hesusu: ‘Füramasetina bun luagu númabadibu lan lidan paraísu.’

Buiti giñe füramasei le! Adián? Subuditi san bun ka lan luwuyeri paraísu uagubei ladimureha Hesusu? Halíañein meha san paraísu le ladügübei Bungiu furumiñe? Anha, ya Ubouagu. Ani danme le larúeihan Hesusu sielu, lásaaragüdübei wügüri le lídangiñe óunweni, lun gayara lan lagundaarun lidan iseri Paraísu Ubouagu. Ma buiti katei le?

Matéu 26:57-75; 27:1-50; Lúkasi 22:54-71; 23:1-49, NM; Huan 18:12-40; 19:1-30.