TALA kama chuma chino chipi chinji! Yesu kanafu. Ayo hamuhata ha mutondo. Mbambo hijatuwa moko ni yiliato yenyi. Mumu liaka umwe mutu te mazanga kulinga chino chuma hali Yesu?

Chino chalingiwa mumu amwe atu te kakuvwila Yesu kole. Yena unanyingika atu jacho? Umwe wa kuli ayo kali mungelo mupi Satana mwe Ndiapu. Iye kali mungelo yoze unakapiangula Alama ni Eva hanga ehuke kuli Yehova. Nawa Satana mwe washinjila akwa kole ja Yesu hanga alinge upi weswe au.

Chipwe muze te kanda achihata Yesu ha mutondo, akwa kole jenyi yamulinga yuma yipi chinji. Yena uneuluka chize ayo anakeza ku munda wa Ngetesemane hanga amukwate? Akwa kole jacho te aya? Ewa, ayo te mangana a ulembelo. Tutalenu yize yinakapwako.

Muze mangana a ulembelo yakwata Yesu, apostolo jenyi yachina. Ayo yahichika Yesu ukawenyi, mumu te woma anevu. Alioze, apostolo Petulu ni Yoano ayo te hakamwihi ali. Ayo yakaula hanga amone yize te muyipwa kuli Yesu.

Asasendote yatwala Yesu kuli mukulwana Anase, yoze te wapwile sasendote wa lutwe. Alioze mbunga kuyashimbwileko chinji. Mba hi yatwala Yesu ku zuwo lia Kayafwa mwe te sasendote wa lutwe ha mashimbu jacho. Mangana anji a ulembelo yalikungulula ku zuwo lienyi.

Kuzekwene ku zuwo lia Kayafwa ayo yatesa umwe upatulwilo. Yaneha atu hanga ambe mahuza hakutwala kuli Yesu. Mangana a ulembelo eswe yamba ngwo: ‘Yesu chamutamba kufwa.’ Yamufwila mate ku meso, nawa yamulamba makome.

Muze yuma yeswe yino te yinalingwiwa, Petulu te haze ali mu chipanga. Te kuli chishika chinji ha ufuku wacho, kashika atu yawika kahia. Muze ayo te anoto kahia, umwe ngamba wa pwo yatala kuli Petulu yamba ngwenyi: ‘Lunga au ni neye te kali hamwe ni Yesu.’

Petulu yakumbulula ngwo: ‘Ka, hi yami ko!’

Ha yisuho yitatu, atu yamba kuli Petulu ngwo iye te kakwenda ni Yesu. Alioze ha yisuho yeswe, Petulu yakumbulula ngwo, hi chamwemwene ko. Hi ha chisuhwo chamuchitatu muze Petulu hakumbulula chocho, Yesu yateuluka yatala kuli iye. Petulu yanyenganyana chinji hakwamba mahuza jacho, chocho yaya kwenyi ni kulila.

Muze te hikwacha ha tangwa liamatano, asasendote yatwala Yesu ku chihela chinene cha ukungululo, mu chipatulo cha Sinedrio. Muzemwene ayo yahanjika hakutwala ku yize te mamulinga. Ayo yamutwala kuli Poshiu Pilatu, nguvulu wa mambonge a Yunda.

Asasendote yamba kuli Pilatu ngwo: ‘Lunga au mupi chinji. Chatamba kumushaha. Muze Pilatu te halinga yihula kuli Yesu, iye yamba kuli ayo ngwenyi: ‘Yami chiso kumona upi uze lunga yono alinga.’ Chocho Pilatu yatuma kutwala Yesu kuli Heronde Andipa. Heronde te nguvulu wa mu Ngalileya, alioze iye te kali mu Yerusaleme. Heronde ni neye yamona ngwo Yesu kalingile nichimwe chuma chipi, kashika iye yamufunyisa nawa kuli Pilatu.

Pilatu yazanga hanga atusule Yesu. Alioze akwa kole ja Yesu yazanga hanga atusule funge wakacheka mu chehela chenyi. Lunga wacho te mwiji mwe Mbarapa. Muze Pilatu atuhwishile Yesu haze tangwa te hiliapwa ha muchima. Iye yamba kuli atu ngwenyi: ‘Talenu! Mwanangana wenu!’ Alioze asasendote akwa lutwe yakololoka ngwo: ‘Mumbatenu! Mushahenu! Mushahenu! Hi Pilatu yatusula Mbarapa hanga aye kwenyi, ayo yambata Yesu hanga amushehe.

Ha tangwa liamatano ha chingoloshi, Yesu yamuhata ha mutondo. Nawa kanakahata malunga aali ha mitondo sali ni sali lia Yesu, yena uchikuhasa kwamona ha chizulie chino mumu keshoho. Muze te kwasala hakehe hanga Yesu afwe, umwe wa kuli malunga jacho api yamba kuli iye ngwenyi: ‘Ungwiuluka kama muze munjila mu wanangana we. Yesu yamukumbulula ngwenyi: ‘Pundu ngunakulakenya musono ngwami, yena mukapwa hamwe ni yami mu paraisu.’

Chilakenyo chino chili chipema nyi? Yena unanyingika chilakenyo chika Yesu te anambe? Kulihi te kwatwama paraisu yize Zambi alingile ha uputukilo? Ewa, te hashi. Muze Yesu mayula hano hashi ngwe mwanangana wa mu malilu, iye makahindwisa lunga wacho mu ufwe hanga akatwame mu paraisu yaha hano hashi. Yuma yino yatwaha chiseke nyi?