GETE ki pe arive avek Zezi. Zot in met li lo en poto, e zot in klout son lanmen ek son lipye. Akoz zot in fer en keksoz parey avek Zezi?

Akoz serten dimoun ti ay Zezi. Eski ou konnen lekel zot? Enn parmi ti sa move lanz Satan Dyab. I ti sa enn ki ti reisi fer Adan ek Ev dezobei Zeova. E se li menm ki’n fer bann lennmi Zezi fer sa krim terib.

Menm avan ki Zezi ti ganny kloute lo sa poto, son bann lennmi ti fer li en ta keksoz mal. Ou mazinen konman zot ti vin pran li dan zarden Zetsemane? Lekel sa bann lennmi? Wi, zot ti bann sef relizye. Annou vwar ki ti arive apre.

Kan bann sef relizye ti atrap Zezi, son bann zapot ti taye. Zot ti kit Zezi tousel avek son bann lennmi, akoz zot ti per. Me zapot Pyer ek Zan pa ti al lwen. Zot ti swiv pour vwar ki ti pe al arive avek Zezi.

Bann pret ti anmenn Zezi kot Ann, ki ti gran pret avan. Sa lafoul pa ti reste la pour lontan. Apre zot ti anmenn Zezi kot lakaz Kaif, ki ti gran pret sa letan. En kantite sef relizye ti’n rasanble kot son lakaz.

La kot lakaz Kaif zot ti ziz Zezi. Zot ti fer en kantite dimoun koz lalang lo Zezi. Tou bann sef relizye ti dir: ‘Zezi i devret ganny touye.’ Apre zot ti kras dan son figir, e zot ti donn li kou-d-pwen.

Pandan ki tousala ti pe pase, Pyer ti pe asize deor dan lari. Ti fer fre sa zour swar, alor bann dimoun ti alim en dife. Ler zot ti pe sof zot otour dife, en servant ti get Pyer e i ti dir: ‘Sa zonm osi ti avek Zezi.’

‘Non, pa vre!’ Pyer ti reponn.

Trwa fwa bann dimoun ti dir avek Pyer ki i ti avek Zezi. Me tou le trwa fwa Pyer ti dir ki sa pa ti vre. Trwazyenm fwa ki Pyer ti dir sa, Zezi ti vire e get li. Pyer ti vreman regrete akoz i ti’n koz lalang, i ti ale an pleran.

Vandredi gran maten, bann pret ti pran Zezi e anmenn li dan gran lakour konsey Zwif ki ti apel Sannedren. Laba, zot ti diskite ki zot pou fer avek Zezi. Zot ti anmenn li kot Pilat, ki ti ansarz distrik Zide.

‘I en move zonm,’ bann pret ti dir avek Pilat. ‘I devret ganny touye.’ Apre ki i ti’n fini demann Zezi kestyon, Pilat ti dir: ‘Mon pa vwar nanryen mal ki i’n fer.’ Apre Pilat ti anvoy Zezi kot Erod Antipas. Erod ti dirize an Galile, me i ti pe reste an Zerizalenm sa letan. Erod osi pa ti vwar okenn keksoz mal ki Zezi ti’n fer, alor i ti anvoy li ankor kot Pilat.

Pilat ti anvi les Zezi ale. Me bann lennmi Zezi ti oule ki en lot prizonnyen i ganny large dan plas Zezi. Sa zonm ti en bandi, i ti apel Barabas. Ti apepre midi kan Pilat ti anmenn Zezi deor. I ti dir avek bann dimoun: ‘La zot lerwa!’ Bann sef pret ti kriye: ‘Touy li! Touy li!’ Alor Pilat ti larg Barabas e gard Zezi pour ganny touye.

Vandredi apremidi, Zezi ti ganny kloute lo en poto. Lo sak kote Zezi ti annan en bandi ki zot osi zot ti’n ganny kloute lo en poto. Avan ki Zezi ti mor, enn ant sa de bandi ti dir avek li: ‘Mazin mwan kan ou antre dan ou rwayonm.’ Zezi ti reponn: ‘Mon promet ou ki ou pou avek mwan dan paradi.’

Eski sa pa i en promes merveye? Eski ou konnen ki sa paradi ki Zezi ti pe koz lo la? Kote sa paradi ki Bondye ti fer okonmansman ti ete? Wi, lo later. Kan Zezi pou dirize konman lerwa dan lesyel, i pou fer sa zonm reviv ankor dan sa nouvo paradi lo later. Eski pa sa i fer nou kontan!