¡IBMAR imaglenaid be dagge! Jesús oburgwelenai. Suwargi bioglegale nai. Argangi geb nag gine bioglegarbali. ¿Ibigala dule weyob ibmar imagbie gualirsunna?

Daggargua abar dulemar isdar Jesús dagmala. ¿Be wisi doamala? We dule wargwen, ángel isgana gue, Nia. We ángel imasgusa Adán, Evabo mer Jehová bali ibmar imagmalad. Geb Nia emisgi imasbali Jesús e isdarmalad Jesús oburgwemalaga.

Jesús biogleged iduar, e isdarmalad sabsur imasmala. ¿Be ebinsae Getsemaní neg nugadse noniggi gusmaladi, geb degine dulemar Jesús sesmalad? E isdarmalad, ¿doa dulemarsunna? Babigargi emar idumaladi. Anmar daggoena igi sorbali gusbali.

Babigargi emar idumalad Jesús sesmargua, Jesús apóstolmar waggiddemala. Gwaggidmala, geb walagwen Jesús meddemala e isdarmalad abargi. Auggine apóstol Pedrodi, geb apóstol Juandi diggasur nadsurmala. Dulemar sorba nadabbi gusmala, daggega igi Jesús imaglegodibeye.

Sacerdotemala Jesús sesmala dador Anás nugadse, we duledi sacerdote e dummadga mai gusadi. Dulemar undar weg anbiggussuli. Sorba Jesús sesmala, dule Caifás nugad negse, we dule aunni sacerdote e dummadga mai. Aa negyag, buggidar babigargi emar idumalad buggwa.

Wegine, Caifás negyag, soglegoedi igi Jesús imaglegoe. Emisgi dulemar senonimala Jesúsgi gaggansamalaga. Bela babigargi emar idumalad sogmala: ‘Jesús oburgweleged abelege’. Geb Jesús wagargi wiagdemala, geb argan olole sarsosmarbali.

Bela we ibmar imaglenagua, Pedrodi negmagabali gwissi. Aa muddig negdiobbigwa, degsoggu dulemar soo ogasmala. Degi soo ebiris wabuggwadgi, ome maiga gudiidi Pedro daggali geb soggali: ‘We dule Jesúsba gudimogana’.

Pedro, ome abinsoged: ‘¡Suli, andi we dule bali gudisulina!’.

Ilabaa dulemar Pedrog sogsa, be Jesúsba gudigusye. Auggine Pedrodi osulosdae. Ilabaa gine Pedro deyob osulosdaedgi, Jesús, Pedrosig agbiride geb Pedro dagde. Pedro wileiddoali gaggansasad bali, degine, nadsunna geb boali.

Dad gaargua viernes wagdar, sacerdotemala Jesús sesmala e igar iddoged neg dummad siidse, Sanedrínye we neg nugad. Wegine igar amiarmala igi Jesús imagmaloe. Poncio Pilato sega sesmala, we duledi Judea yargi aunni negdagmai.

Pilato gala sogmala: ‘We dule, dule isgana. Oburgweleged abelege’. Geb Jesús sega ibmar egissad sorba, Pilato soggali: ‘We dule gwen ibmar isgana imas an dagsulid’. Degiidgi Pilato, Herodes Antipas sega, Jesús sedmalag imassunna. Herodes Antipas, Galilea yar dagmaidi, aunni Jerusaléngi gudii. We dule anba Jesús gwen ibmar isgana imagdii dagsurmoga, geb gannar Pilatos, Jesús barmileali.

Pilatodi, Jesús onobie. Auggine Jesús isdarmaladdina abemala Pilato dule baid galesiidi onogedi, we dule baiddi nuga Barrabás, dule addursili. Emisgi negyooruggu gubinne, Pilato negmagaba Jesús onosa. Geb Pilato dulemarga soge: ‘¡Dagmalana! ¡Bemar rey!’. Auggine sacerdote e dummagan, binnasur goddemala: ‘¡Oburgwe!’. Degi Barrabás onolessunna, geb Jesúsdi selesa oburgwelegega.

Viernesgi, gebe Dad agludedgi, suwargi Jesús biogsamala. Sobarnaidgi be dagge, auggine Jesús diggarba egeg dule isganamar warbo suwargi nasiglesmarmoga burgwemalaga. Geb Jesús burgwed iduale, wargwen Jesúsga soge: ‘Be reinog be arbadele, an ebinsao’. Geb Jesús abinsogde: ‘An beg soge, Neg Yeerdaglegedgi be anbo gudisaoe’.

¡Ibiyob nued gue ega ibmar soglesad! ¿insoa? ¿Be wisi we neg yeerdagleged Jesús obarisadi, ibu obare? ¿Bia gebe unni Babdummad neg yeerdagleged nasissunna? Nabbaneg gine. Geb Jesús nibneggi negdagmai gude sogele, gannar we dule odulogoe Nabbaneggi Neg Yeerdagleged gannar nagunoniggoedgi yeeriddodi guega. ¿We nued gusur be binsae?