Kukwe kira 101

Jesús kämikani

¡KUKWE tare krubäte tä nemen bare mike ñärärä! Jesús kämikata. Metani kribätä. Klabo metani kisete bätä ngotote. ¿Ñobätä nitre kukwe ye nuainbare?

Ñobätä ñan aune nitre ruäre brukwä nämene kräke. ¿Nire nire gare mäi? Iti ángel töi käme Satana Diablu. Niara Adán bätä Eva töimikani ñaka Jehová mike täte. Aune Satana käkwe nitre Jesús rüe töimikani kämike.

Nitre Jesús rüe jämi mete kribätä känenkri, kukwe tare nuainbare niarabätä kwetre. Nitre ye nikani kä Getsemaní känti aune Jesús jänikani ngite kwetre, ¿ye törö mäi? ¿Nitre Jesús rüe ye nire? Ye nitre ji ngwanka kukwebätä. Ye bitikäre dre namani bare ani mike gare jai.

Nitre ji ngwanka kukwebätä nikani Jesús ngwena aune, nitre apóstol kwe ye ngitiani. Niaratre nikaninkä, aune mikaninte kaibe kwetre rüe yebe. Akwa apóstol Pedro bätä Juan ñaka nikani mente. Dre rabai bare Jesubätä ye nikani mike ñärärä jiebiti.

Nitre sacerdote nikani Jesús ngwena Anás ni umbre yekänti, niara ye nämene käne sacerdote bäri kri. Nitre kwati ye ñaka namani raire kä yekänti. Biti Jesús jänikani kwetre Caifás gwirete, niara nämene sacerdote bäri kri. Nitre ji ngwanka kukwebätä nämene kwati krubäte yete.

Caifás ye gwirete kukwe ükaninte. Nitre ruäre jänükani kukwe ngwarbe niekäre Jesubätä. Nitre ji ngwanka kukwebätä jökrä käkwe niebare: ‘Jesús kämikadre.’ Biti käli kitani Jesús ngwärebätä, aune metani kisebiti.

Kukwe jökrä ne namani bare aune, Pedro nämene jubäre. Kä namani tibo deu aune nitre ñukwä bukaninte. Nitre nämene ja mike krube ñukwä bäreta ye ngwane, meri iti sribikä käkwe nikrabare Pedro yebätä aune niebare kwe: ‘Ni ne täni Jesube arato.’

‘¡Ñakare, ti ñaka täni niarabe!’ Pedro niebare.

Pedro nämene Jesús ben ye bämä nitre niebare ie. Akwa ye jökrä ngwane Pedro namani ñakare niere. Bämäkäre Pedro ye niebare aune, Jesús nikwitaninte aune mikani ñärärä kwe. Pedro ni ngökabare yebätä namani ulire krubäte, aune nikani mento biti namani ngetrekä.

Bierne dekä Ñänä jatani nen kwin aune, nitre sacerdote nikani Jesús ngwena Sanedrín, kä gätäkrä kwetre yekänti. Yete dre nuaindi kwetre Jesubätä ye kädriebare kwetre. Poncio Pilato gobranka kä Judea, yekänti nikanintre ngwena.

‘Ni ne töi käme,’ niebare kwetre Pilato ie. ‘Niara kämikadre.’ Pilato kukwe ngwanintari Jesús ie biti niebare kwe: ‘Ñaka kukwe käme nuainne raba tuin tie.’ Biti, Herodes Antipas gobranka Galilea, nämene Jerusalén yekänti Pilato nitre juani Jesús ngwena. Jesús ñaka kwani ngite ie arato, aune juaninta kwe Pilato ie.

Pilato tönamani Jesús tuainmetre kwäre. Akwa Barrabás ni gokä nämene ngite ye nitre Jesús rüe tönamani Pilato tuai mike kwäre. Kä namani bäsi ñänä ruäre aune Pilato nikani Jesús ngwena jubäre. Pilato niebare nitre ie: ‘¡Rei munkwe! ¡Mike ñärärä! Akwa nitre sacerdote bäri ütiäte käkwe niebare ja dibiti: ‘¡Denkä! ¡Kämike!’ Ye erere, Barrabás mikani kwäre, aune Jesús jänikani kämikadre.

Bierne dere metani kribätä kwetre. Nete ñaka tuin mäi, akwa Jesús kise ruin aune ngebere yekri ni ni mada kämikaka metani kribätä arato ne kwe gatadre. Jesús jämi krüte ye känenkri, ni iti ni kämikaka käkwe niebare: ‘Mä raba gobran mäkwe yete aune mä ti ngwan törö jai.’ Aune Jesús niebare: ‘Mä tädi kä Bä nuäre yete tibe tita käbämike mäi.’

¡Jondron kwin krubäte käbämikani! ¿ñan ererea? ¿Kä bä nuäre medenbätä Jesuta blite gare mäi? ¿Kä bä nuäre Ngöbö sribebare kena ye nämene medente? Jän, Kä tibienbätä. Aune Jesús rabai gobrane kä kwinbiti ye ngwane, ni ye gaikröta kwe ne kwe rabadre nüne Kä mrä bä nuäre yete Kä tibienbätä. Ye kwin krubäte ¿ñan ererea?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.