IA VARA noho gau dikana mani oi itaia! Iesu idia hamasea. Au ta dekenai ia idia taua dae. Iena imana bona aena be ikoko amo idia kokoa. Dahaka dainai Iesu dekenai unai bamona idia karaia?

Badina taunimanima haida ese Iesu idia inai henia. Idia oi diba, a? Idia ta be aneru dikana, Satani Diabolo. Ia ese Adamu bona Heva ia koia dainai Iehova idia gwau-edeede henia. Bona Satani dainai, Iesu ena inai taudia ese inai kara dika bada herea idia karaia.

To Iesu be inai au dekenai idia do kokoa lasi neganai, ena inai taudia ese idia kara dika henia. Getesemane umana dekenai idia mai bona ia idia abia lao dalana oi laloatao, a? Unai inai taudia be daidia? Oibe, idia be tomadiho gunalaia taudia. Gabeai ia vara gaudia mani ita itaia.

Tomadiho gunalaia taudia ese Iesu idia abia lao neganai, ena aposetolo taudia idia heau oho. Idia gari dainai Iesu be sibona ena inai taudia danu idia rakatania. To aposetolo Petero bona Ioane be daudau gabuna dekenai idia lao lasi. Iesu murinai idia raka ia dekenai do idia vara gaudia idia dibaia totona.

Hahelaga taudia ese Iesu be tau burukana Ana, guna ia be hahelaga tauna badana, dekenai idia hakaua lao. To hutuma be unuseniai nega daudau idia noho lasi. Gabeai hahelaga tauna badana Kaiapa ena ruma dekenai idia abia lao. Tomadiho gunalaia taudia momo be ena ruma dekenai idia haboua.

Kaiapa ena ruma dekenai idia kota henia. Taunimanima haida idia hakaua vareai, bena koikoi herevadia Iesu dainai idia gwauraia. Tomadiho gunalaia taudia ibounai idia gwau: ‘Iesu ita hamasea be namo.’ Bena ena vairana idia kanudia bona edia imana amo idia botaia.

Inai gau ibounai idia vara noho lalonai, Petero be murimuriai. Unai be keru hanuaboina dainai, taunimanima ese lahi idia karaia. Lahi dekenai edia kopina idia hasiahua noho lalonai, hesiai kekeni ta ese Petero ia itaia, bona ia gwau: ‘Inai tau danu ese Iesu ia bamoa.’

Petero ia gwau: ‘Lasi, ia lau bamoa lasi!’

Nega toi taunimanima idia gwau ia be Iesu ia bamoa tauna ta. To nega toi Petero ia gwau ia bamoa lasi. Nega ihatoina unai ia gwauraia neganai, Iesu ia giroa bona Petero ia itaia. Petero be ia gwauraia hereva koikoidia dainai ia lalohisihisi bada, bona ia lao bona ia tai.

Friday daba ai, dina ia daekau matamaia neganai, hahelaga taudia ese Iesu be edia hebou ruma badana dekenai idia abia lao. Unuseniai, ia dekenai do idia karaia karana idia herevalaia. Iuda ena lohia Pontio Pilato dekenai idia hakaua lao.

Hahelaga taudia ese Pilato idia hamaoroa: ‘Inai be tau dikana. Ia mase be namo.’ Pilato ese Iesu ia nanadaia murinai, ia gwau: ‘Ena kerere ta lau itaia lasi.’ Bena Pilato ese Iesu be Heroda Anetipa dekenai ia siaia. Heroda be Galilea ena lohia, to ia be Ierusalema dekenai ia noho. Heroda danu ese Iesu ena kerere ta ia davaria lasi, unai dainai Pilato dekenai ia siaia lou.

Pilato ia ura Iesu ia ruhaia. To Iesu ena inai taudia idia ura dibura tauna ma ta ia ruhaia. Unai tauna be henaohenao tauna Baraba. Dina tubua neganai, Pilato ese Iesu ia hakaua lao murimuri dekenai. Taunimanima dekenai ia gwau: ‘Itaia! Emui king!’ To hahelaga taudia badadia idia boiboi: ‘Abia siri! Alaia! Alaia!’ Unai dainai Pilato ese Baraba ia ruhaia, bona Iesu idia hakaua lao idia alaia totona.

Friday adorahi kahana ai, Iesu be au dekenai idia kokoa. Ena be laulau dekenai oi itaia lasi, to Iesu ena kahana kahana dekenai kara dika taudia rua danu au dekenai idia hamasea. Iesu ia do mase lasi neganai, kara dika tauna ta be ia dekenai ia gwau: ‘Emu basileia lalonai oi vareai neganai, mani lau oi laloatao.’ Bena Iesu ia haere: ‘Lau gwauhamata, lau danu Paradaiso dekenai do oi noho.’

Unai be gwauhamata namo hereana, ani? Oi diba Iesu be edena paradaiso ia herevalaia? Matamanai Iehova ese ia karaia paradaisona be edeseniai? Oibe, tanobada ai. Bona Iesu be guba dekenai king bamona ia lohia neganai, ia ese unai tauna do ia hamauria lou tanobada Paradaiso matamatana ia moalelaia totona. Unai dainai ita moale, ani?