Jesus ma zepewa
EHUNGI 101
Jesus ma zepewa
TARA kotjiṋa otjivi tji matji tjitwa mba! Jesus ma zepewa. Owo ve mu twa kotjihenḓe. Eye wa tonwa nozomboha momake nozombaze ze. Ongwaye ovandu tji mape ya ave tjiti otjiṋa otjivi nao ku Jesus?
Omena rokutja ovandu tjiva va tondere Jesus. Ove mo tjiwa kutja oowaṋi? Umwe wawo omuengeli omurunde, Satan Omudiaboli. Eye ongwa tjita kutja Adam na Eva ave ha puratene ku Jehova. Nu Satan ongwa tjita kutja ovanavita vaJesus ve tjite otjiṋa otjivi hi.
Nandarire Jesus ngunda ee hiya paperwa kotjihenḓe tji, ovanavita naye va tjita oviṋa ovivi ku ye. Ove mo zemburuka indu owo tji ve ya kotjikunino tjaGetsemane nave mu kambura? Ovanavita mbo va ri oowaṋi? Owo va ri ovanane vozombongo. Nambano, indjeye tu tare kutja okuzambo pa tjitwa tjike.
Indu Jesus tja kamburwa kovanane vozombongo, ovaapostele ve va tupuka okuzapo pu ye. Owo va isa Jesus erike pu novanavita naye, mena rokutja owo va uta okutira. Nungwari ovaapostele mba ooPetrus na Johanes kave ire kokure tjinene. Owo va kongorera okuza kokure okutara kutja Jesus ma katjitwa tjike.
Ovapristeri va twara Jesus komurumendu omukurundu wena Anas, rukuru ngwa ri omupristeri omunene. Otjimbumba katji karere orure imbo. Okuzambo owo va twara Jesus kondjuwo yaKajafas, moruveze ndo ngwa ri omupristeri omunene. Ovanane ovengi vozombongo va woronganena pondjuwo ye.
Imba pondjuwo yaKajafas owo va uta okupangura Jesus. Ovandu va etwa okuyekuhungira ovizeze ohunga na Jesus. Ovanane avehe vozombongo va hungira nave tja: ‘Jesus ma sokuzepewa.’ Okuzambo ve mu tjekera omate momurungu nokumutona nozongomi.
Oviṋa mbi avihe tjaavi tjitwa, Petrus wa ri pendje morupanda. Ya ri ongurova yombepera, okutja ovandu va yakisa omuriro. Owo ngunda amave woto omuriro, omusukona omukarere wa tara ku Petrus na tja: ‘Omurumendu ngwi wina wa ri puna Jesus.’
Petrus wa zira na tja: ‘Kako, katjiperi!’
Povikando vitatu ovandu aave raere Petrus kutja wa ri puna Jesus. Nungwari otjikando atjihe Petrus wa pataṋa. Otjikando otjitjatatu Petrus tja hungira nao, Jesus wa taviza ku Petrus. Petrus wa hihamwa omutima ohunga novizeze mbya kora, neye wa ya na karira.
Omuhukomunene waRitjatano, pomapitiro weyuva, ovapristeri va twara Jesus kotjombanguriro tjokombanda tjOvajuda. Poruveze ndwi owo aave tye kutja mave mu tjiti vi. Owo ve mu twara ku Pontius Pilatus, ngwa ri omuhonapare worukondwa rwaJudea.
Ovapristeri va raera ku Pilatus nave tja: ‘Ingwi omurumendu omuvi. Eye ma sokuzepewa.’ Indu Pilatus tja za nokupura Jesus omapuriro, eye arire tja tja: ‘Ami hi nakumuna ondjo momundu ngwi.’ Okuzambo Pilatus wa hinda Jesus ku Herodes Antipas. Herodes wa ri omuhonapare waGalilea, nungwari aa kara moJerusalem. Herodes wina kaa munu kutja Jesus wa tjita otjiṋa otjivi, okutja eye we mu hinda ku Pilatus rukwao.
Pilatus aa vanga okukutura Jesus. Nungwari ovanavita na Jesus aave vanga kutja omukamburwa warwe arire ngwa kuturwa moruveze rwe. Omukamburwa ngwi wa ri omupunde wena Barabas. Ku nai ya ri ape omurongo nambari womutenya indu Pilatus tja pitisa Jesus pendje. Eye wa raera kovandu na tja: ‘Tareye! Ombara yeṋu!’ Nungwari omupristeri otjiuru wa ravaera na tja: ‘Mu twara kwarwe! Mu zepa! Mu zepa!’ Okutja Pilatus wa kutura Barabas, nowo va twara Jesus okukemuzepa.
Rukuru mapeta waRitjatano Jesus wa paperwa kotjihenḓe. Jesus wa papererwe pamwe novarumendu vevari ovarunde, umwe komanene we na umwe komamuho, nungwari nai ove ko nakuvemuna motjiperendero. Okaruveze okasupi ngunda Jesus ee hiya koka, umwe wovarunde mba wa tja ku Jesus: ‘Arikana ndji zemburuka tji wa hiti mouhona woye.’ Jesus we mu zira na tja: ‘Ami me ku kwizikire kutja mo kakara puna ami mOparadisa.’
Ingo kamakwizikiro omawa nao? Ove mo tjiwa kutja oparadisa Jesus ndjaa hungire ooiṋe? Oparadisa indji Mukuru ndja ungurire kombutiro ya ri pi? Oyo ya ri kombanda yehi. Okutja Jesus indu tji ma kahonapara otja ombara meyuru, eye ma kakotora omurumendu ngwi komuinyo kutja ma hupe mOparadisa ombe kombanda yehi. Ihi katji nyaṋukise are?
Mateus 26:57-75; 27:1-50; Lukas 22:54-71; 23:1-49; Johanes 18:12-40; 19:1-30.
