KʼARU yook xkʼulbʼal li Jesus? Keʼxkamsi! Keʼxtʼuyubʼ chiru cheʼ, keʼxkʼe klaʼux chi ruqʼ ut chi roq. Kʼaʼut keʼxbʼaanu aʼin re li Jesus?

Xbʼaan naq xikʼ nekeʼril. Jun rehebʼ li xikʼ naʼilok re li Jesus aʼan laj Tza. Laj Tza kixbʼaanu naq laj Adan ut xʼEva teʼxqʼet li xchaqʼrabʼ li Jehobʼa. Ut laj Tza kixbʼaanu ajwiʼ naq teʼxkamsi li Jesus.

Naq toj maajiʼ nekeʼxkamsi li Jesus, xbʼeenwa keʼxrahobʼtesi. Ma nakaanaw anihebʼ koleʼchapoq re li Jesus saʼ li xnaʼaj li awimq, Getsemani? Ebʼ li xbʼeenil laj tij, li xikʼ keʼilok re li Jesus.

Naq li xbʼeenilebʼ laj tij keʼxkʼam li Jesus, ebʼ li xtzolom keʼelelik ut keʼxkanabʼ xjunes, xbʼaan naq keʼxuwak. Abʼan laj Pedro ut laj Juan toj keʼkanaak chi muqmu re rilbʼal li teʼxbʼaanu re li Jesus.

Ebʼ laj tij keʼxkʼam li Jesus saʼ rochoch laj Anas, li kiwank choʼq xyuwaʼil aj tij. Moko najt ta kiwank li Jesus saʼ rochoch laj Anas. Tojaʼ naq, keʼxkʼam saʼ rochoch laj Caifas, li wank choʼq xyuwaʼil aj tij, xbʼaan naq aran chʼutchʼuukebʼ li xbʼeenilebʼ aj tij.

Saʼ rochoch laj Caifas keʼraqok aatin saʼ xbʼeen li Jesus ut wiibʼ oxibʼ chi winq keʼtikʼtiʼik chirix li Jesus. Chirix chik aʼan, ebʼ li xbʼeenil aj tij keʼxye: ‹Tento xkamsinkil li Jesus!› Tojaʼ naq keʼxchuubʼa ut keʼxsakʼ saʼ xnaqʼ ru.

Naq li Jesus yook chi rahobʼtesiik, laj Pedro wank saʼ xnubʼaal li ochoch. Keʼxtzʼabʼ jun li xaml xbʼaan naq ke ru li qʼoqyink. Wankebʼ chire xaml, naq jun li ixq kiril laj Pedro ut kixye: ‹Li winq aʼin, wank chaq ajwiʼ rikʼin li Jesus›.

Laj Pedro kixye: ‹Laaʼin moko wankin ta rikʼin li winq aʼan›.

Oxibʼ sut keʼxye re laj Pedro naq keʼril ru rikʼin li Jesus. Abʼan, laj Pedro kixye chiru li oxibʼ sut naq moko yaal ta naq wank rikʼin li Jesus. Naq laj Pedro kixye aʼin saʼ li rox sut, kiʼileʼk xbʼaan li Jesus. Joʼkan naq laj Pedro kiyotʼeʼk xchʼool ut xko chi yaabʼak xbʼaan naq inkʼaʼ kixye li yaal.

Saʼ li Viernes eqʼla keʼxkʼam li Jesus saʼ li Sanedrin, bʼarwiʼ nekeʼraqok aatin. Aran keʼxkʼuubʼ naq teʼxkʼam li Jesus rikʼin laj Poncio Pilato, li kijolomink saʼ xteepal Judea.

Ebʼ laj tij keʼxye re laj Pilato: ‹Li winq aʼin, moko us ta xnaʼlebʼ. Tento xkamsinkil!› Naq laj Pilato kiraqeʼk chi xbʼaanunkil li patzʼom re li Jesus, kixye: ‹Inkʼaʼ nintaw xmaak li winq aʼin›. Joʼkan naq laj Pilato kixtaqla li Jesus saʼ li tenamit Jerusalen rikʼin laj Herodes Antipas, li awabʼej re Galilea. Laj Herodes inkʼaʼ kixtaw ajwiʼ xmaak li Jesus, joʼkan naq kixtaqla wiʼ chik rikʼin laj Pilato.

Laj Pilato kiraj rachʼabʼankil li Jesus, abʼan ebʼ li xikʼ nekeʼilok re, keʼxye naq rachʼabʼaqebʼ laj Barrabas, laj elqʼ, choʼq reqaj li Jesus. Ak wulak re waʼlebʼ naq laj Pilato kirisi li Jesus chirix kabʼl ut kixye re li tenamit: ‹Ilomaq leeʼawabʼej!› Tojaʼ naq li xbʼeenilebʼ laj tij keʼxjap re xyeebʼal: ‹Isi li winq aʼin chiqu ut kamsi!› Laj Barrabas kiʼelk saʼ tzʼalam, abʼan li Jesus keʼxkʼam chi xkamsinkil.

Saʼ li Viernes ewuuk keʼxtʼuyubʼ li Jesus chiru jun li cheʼ. Chi xkʼatq li Jesus keʼxkʼe wiibʼ laj elqʼ. Ak kamk re li Jesus, naq jun rehebʼ laj elqʼ kixye re: ‹Chinjultikoʼq aawe naq wanqat saʼ Laanimajwal Awabʼejilal›. Tojaʼ naq li Jesus kixye re: ‹Chʼolchʼo naq wanqat wikʼin saʼ li Sahilal Naʼajej!›

Ma nakaanaw kʼaru li Sahilal Naʼajej aʼin? Bʼar kixkʼe li Yos li Sahilal Naʼajej saʼ xtiklajik? Saʼ li Ruuchichʼochʼ. Naq li Jesus t-awabʼejinq saʼ choxa, tixwaklesi wiʼ chik chi yoʼyo li winq aʼin re naq twanq saʼ li Sahilal Naʼajej, arin saʼ li Ruuchichʼochʼ. Kʼajoʼ xchaabʼilal li tixbʼaanu li Jesus!