AKIMONA kintu kyatama kyamwekele! Yesu bamwipayile. Bamubikile pa kichi kya lumanamo. Bamupopele misomali mu maboko ne ku maulu. Mambo ka bantu o bamubijile kino Yesu?

Ke na mambo a kuba’mba bantu bamo bamushikilwe Yesu. Nanchi wibayuka bano bantu nyi? Umo pa bano bantu ke malaika watama, aye Satana Diabola. Ye iye walengejile ba Adama ne Evwa kusatukila Yehoba. Kabiji Satana ye walengejile ne balwanyi ba kwa Yesu kuba kino kintu kyatama.

Nangwatu kimye Yesu saka bakyangye kumupopa pa kino kichi kya lumanamo, balwanyi banji bamubilenga mwenga. Nanchi wavuluka kimye kyo baishile mu bujimi bwa Ngesemani na kumusenda nyi? Bano balwanyi bajinga bañanyi? Ee, bajinga bantangi ba bupopweshi. Twaya tumone kyaubiwe.

Yesu byo bamusendele ku bantangi ba bupopweshi, batumwa banji banyemene. Bamushile Yesu bunke na balwanyi banji mambo bachiine. Bino mutumwa Petelo ne Yoano kechi banyemene kuya kwalepa ne. Balondejilenga pa kuba’mba bamone kyamumwekejile Yesu.

Bañanga bamutwajile Yesu kwi Anasa, wajinga kala ñanga mukatampe. Jino jibumba kechi jabanjile kwi aye ne. Bamutwajile ku nzubo ya kwa Kaifasa, awo waikele pano ke ñanga mukatampe. Bantangi ba bupopweshi bavula bapwijile ku nzubo yanji.

Byo bafikile ku nzubo ya kwa Kaifasa, bamutwajile mu kije. Baichilenga bantu kuba’mba beye na kushiina Yesu bya bubela. Bantangi ba bupopweshi bonse baambile’mba: ‘Yesu wafwainwa kwipayiwa.’ Kepo batendekele kumushipila mate mu meso ne kumupuma binkonyi.

Bino byonse byo byaubiwenga, Petelo wajinga pangye mu kipango. Abwa bufuku kwaubile bingi mashika, kabiji bantu babanzhile mujilo. Kimye kyo baotelenga mujilo, kamwale wamutajile Petelo ne kwamba’mba: ‘Uno muntu naye wajinga ne Yesu.’

Petelo wakumbwile’mba: ‘Ine, wambepelatu!’

Pa bimye bisatu, bantu bamwambijile Petelo amba wajinga ne Yesu. Pa bino bimye byonse Petelo waambilenga’mba kechi wajinga ne aye ne. Kimye kya busatu Petelo kyo aambile bino, Yesu wafutulukile ne kumutala. Petelo waumvwine bingi bulanda byo abepele kabiji wafuminepo saka ajila.

Byo bwakile lukelo pa Kitanu, bañanga bamutwajile Yesu ku kije kyabo kikatampe kya Saniedilini. Kuno besambilenga pa byo bakebelenga kumuba. Bamutwajile kwi Pontiusa Pilato, ndamakyalo wa nkambi ya Yudea.

Bañanga baambijile Pilato amba: ‘Uno muntu watama bingi. Wafwainwa kwipayiwa.’ Panyuma ya kumwipuzha Yesu mepuzho, Pilato waambile’mba: ‘Kechi namonamo kintu kyatama mwi aye ne.’ Ponkapo, Pilato wamutumine Yesu kwi Heloda Antipasa. Heloda wajinga ndamakyalo wa mu Ngalilea, pano bino waikalanga mu Yelusalema. Heloda naye wamwene’mba Yesu kechi waubilepo kintu kyatama ne, onkao mambo, wamutumine jibiji kwi Pilato.

Pilato wakebelenga kumukasululako Yesu. Bino balwanyi ba kwa Yesu bakaine’mba nanchi bakasulwilemo muntu ungi. Uno muntu ke Balabasa wajinga kapondo. Pilato wafumishe Yesu pangye na kimye kya mute. Waambijile bantu amba: ‘Monai! Mfumu wenu!’ Bino bañanga bakatampe babijikile’mba: ‘Mutwalai! Mwipayai! Mwipayai!’ Onkao mambo, wibakasulwijile Balabasa, pakuba Yesu bamutwajile kuba’mba bakamwipaye.

Pa Kitanu mute, Yesu bamupopele pa kichi kya lumanamo. Nangwa kya kuba kechi wibamona pa kipikichala ne, bino ku kilujo ne ku kipiko kwa kwa Yesu kwajinga batupondo babiji bo bapopejile pa bichi bya lumanamo. Kakimyetu kacheche Yesu saka akyangye kufwa ne, umo pa boba batupondo wamwambijile’mba: ‘Mukamvuluke byo mukeya mu bufumu bwenu.’ Kabiji Yesu wamukumbwile’mba: ‘Kine nakulaya namba ukekala ne amiwa mu Paladisa.’

Nanchi uno kechi mulaye wawama nenyi? Abya wayuka paladisa ye aambilengapo Yesu nyi? Nga paladisa ye alengele Lesa patanshi wajinga pi? Ee, wajinga panopantanda. Kabiji Yesu byo akalamanga mwiulu ke mfumu, ukasangula uno mwanamulume kuba’mba akeyowe mu Paladisa panopantanda. Nanchi kino kechi kituletela lusekelo nenyi?