TARA sininke sosidona esi sina kuhoroka! Jesus kuna kumudipaga. Awo kuna mu tura kositji. Nomboha tava di pampara momake nomonompadi dendi. Ee, yinke na yi ruganena nkenye muntu eyi kwaJesus?

Morwa vantu vamwe kwa nyenga Jesus. Ono diva asi wolye vene ava? Gumwe gwawo kuna kara muengeli gomudona Satana Muzonaguli. Age kuna kara ogu ga ninkisire oAdamu naEva va nyoke Jehova. Ano Satana yige ga ninkisire nonkore daJesus di rugane ukorokotji woudona ou.

Nampili komeho zokuyapampara Jesus kositji esi, nonkore dendi tadi mu rugana yininke yoyidona. To diworoka apa va wizire kosikunino saGesemani nokuyamukwata? Wolye va kere nonkore dina? Yimo, awo kwa kere vampitisili womaukerelikarunga. Tu tareni asi yinke yina kuhoroka kutunda apa.

Jesus apa vana mu twara vampitisili womaukerelikarunga, vapositoli vendi tava duka. Tava sigi Jesus gelike nononkore, morwa vana tjira. Nye vapositoli oPeturusa naJohanesa kapi vana duka va ze ure unene. Tava kwama monyima va tare asi yinke yina kuhorokera Jesus.

Vapristeli tava twara Jesus komuswamane Anasi, ogu ga kere nare mupristeli gomunene. Mbunga kapi zina ka kara ko siruwo sosire. Kutunda opo, tava twara Jesus kembo lyaKayifasa, ogu ana kara ngesi mupristeli gomunene. Vampitisili womaukerelikarunga wovanzi vana ya pongo ngesi pembo lyendi.

Kembo lyaKayifasa oku tava kara nompanguro. Vantu tava va reta va ya tante yimpempa kuhamena Jesus. Vampitisili womaukerelikarunga navenye tava tanta asi: ‘Jesus va kona kumudipaga.’ Makura tava mu fizagere mosipara sendi, nokumutoona nononyongo dawo.

Apa yina kuhoroka nayinye eyi, Peturusa age meharango ponze. Ago masiku gomufu, makura vantu tava hwameke mundiro. Eyi vana kuligenyeka komundiro, mukereli gumwe gomukadona ta tara Peturusa nokutanta asi: ‘Mugara ogu nage naJesus ga kere.’

Peturusa ta limburura asi: ‘Hawe, kapisi nyame!’

Peturusa kwa mu tanterere vantu yikando yitatu asi naJesus ga kere. Nye yikando nayinye eyi Peturusa ta tanta asi kapisi usili. Peturusa apa ana kuyiuyunga sikando sautatu, Jesus ta piruka nokumutara. Peturusa ta livere unene kweyi ana uyunga yimpempa, makura ta pwaga ta ka lira.

Apa lina kupuma ezuva mEtitano ngurangura, vapristeli tava twara Jesus kevango lyawo lyomapongero gomanene, sinyanga sosigongi somasimbi. Oku tava liyongo asi yinke nava mu rugana. Tava mu twara kwaPontiusi Piratusa, mupangeli gomukunda gwaJudeya.

Vapristeli tava tantere Piratusa asi: ‘Ogu mugara gomudona. Age va kona kumudipaga ntani.’ Konyima zokupuragera Jesus, Piratusa ta tanta asi: ‘Ame kwato epuko eli nina kumona ga rugana.’ Piratusa makura ta tumu Jesus kwaHerodesa Antipasi. Herodesa mupangeli gwaGalireya, nye ngesi kuna kara moJerusarema. Herodesa nage si kapi ana kumona asi Jesus ga rugana nkenye epuko, makura ta mu tengwida kwaPiratusa.

Piratusa ana hara asi a sige Jesus a ze. Nye nonkore daJesus dina hara asi va sige munadorongo nagepeke a ze. Munadorongo ogu kuna kara munamahaka Barabasa. Ngesi lina tenguka nye apa Piratusa ana pwagesa Jesus ponze. Ta tantere vantu asi: ‘Tareni hompa gweni!’ Nye vapristeli wovanene tava zigire asi: ‘Mu guseni po apa! Mu dipageni! Mu dipageni!’ Piratusa makura ta mangurura Barabasa, ano Jesus tava mu twara va ka mu dipage.

Tupu lina kutenguka mEtitano, Jesus tava mu pampara kositji. Kwankenye ruha rwaJesus kuna kara ko mukorokotji ogu vana kudipaga kositji, nampili ngomu ono kupira kuvamona mefano. Siruwogona tupu komeho Jesus a fe, mukorokotji gumwe ta mu tantere asi: ‘Ngo diworoke nge apa ngo za mouhompa woge.’ Jesus ta limburura asi: ‘Tani ku tumbwidire asi ngo ka kara kumwe name moParadisa.’

Nani kapisi etumbwidiro lyewa eli? Ono diva asi paradisa musinke ezi ana kuuyunga Jesus apa? Kupi oku za kere paradisa ezi ga rugene Karunga petameko? Yimo, pevhu. Jesus apa nga pangera ngahompa meguru, nga ka reta mugara ogu komwenyo a ya hafere Paradisa zompe pevhu. Nani kapi tayi tu hafesa eyi?

Mateusa 26:57-75; 27:1-50; Rukasa 22:54-71; 23:1-49; Johanesa 18:12-40; 19:1-30.