¡OK IX mëk axëëk diˈib yam tuun jäjtëp! Yëˈë yam yaˈoˈktëbë Jesús. Të tkudëytyë mä tuˈugë kepy etsë kyëˈë tyeky të tkëxwojpëdë mëdë klääbës. ¿Tiko dëˈënë jäˈäy tyuunë?

Yëˈko yëˈë jäˈäy axëkˈijxëdë. ¿Mnijäˈäp pënatyëty? Tuˈuk diˈib axëkˈijxë yëˈë Satanás tadë anklësë axëkjäˈäybyë. Diˈibë Adán mëdë Eevʉ ojts ttukmëduundëgoytyë Jyobaa. Ets yëˈë diˈib yajmadaktë jäˈäy ets dëˈën ttundëdë Jesús.

Mä netyë Jesús kyayajkëxwopynyëm kepykyëjxy, axëëgë myëtsipëty jyantsy tyuunëdë. ¿Mjamyejtsypy ko yajnimiiny Jetsemanii ets ojts yajmënejxy? ¿Pënatyë nety mëtsipˈäjtëdëp? Yëˈë ja diˈib nyiwintsënˈäjttëbë relijyonk. Min nˈokˈijxëm ti net tuun jäjtë.

Ko ja wintsëndëjk ojts tmäjtsnëdë Jesús, ta ja yˈapostëlëtëjk kyaktääytyë. Tsëˈkëdë, ets ta tnikaktë Jesús mëdë myëtsip. Yëˈëyë Peedrʉ mëdë Fwank ojts tpanëjxtë Jesús ets tˈixäˈändë wiˈix jyaty.

Ja saserdotëty ta ojts tmënëjxtë Jesús mä Anás, diˈibë nety të yˈoktuumbë wintsën mä saserdotëty. Per kyaj ja may jyaˈay jam jeky ojts wyëˈëmëdë. Ta ojts tmënëjxtë Jesús mä Kaífas, diˈibë nety nyiwintsënˈäjtypyë saserdotëty. Jam tamë nety nimayë wyintsëndëjk.

Mä ja Kaifasë tyëjk jam ojts tˈëxtääyëdë Jesusë pyoky. Ta tmëmiindë yetyëjkëty diˈib nyiwäämbajttë Jesús. Ets niˈamukë ja diˈib nyiwintsënˈäjttëbë relijyonk jyënandë: Waˈan dyajmoˈoyë oˈkënë Jesús. Ta twintsujëˈktë ets tkojxtë.

Mä dëˈën ja Jesús yajtuny, Peedrʉ tapë nety tëjkwiiny. Kootsë nety ets xujxp, ets tapë netyë jäˈäyë jëën të dyajmëjëdë. Ets mä nety jam xyamdë ta tuˈugë poˈoduumbë tˈijxyë Peedrʉ ets jyënany: Tyäˈädë jäˈäy yëˈë nandëˈën mëdë Jesús të jyëdity.

Peedrʉ ta yˈatsoojy: Kyaj, kyajts mëët të njëdity.

Tëgëk okë Peedrʉ yaˈanmääjy ko yëˈë mëdë Jesús të jyëdity. Perë Peedrʉ jyënany ko kyaj. Ets mä myëdëgëkˈokpë jyënaˈany ko kyaj, ta Jesús nyiˈijxˈawdijtë ets wyinˈijxë. Peedrʉ ta jyantsy jotmaytyuktëjkë ko nety të yˈandaˈaky, ta ojts pyëtsemy ets tyëjkë jëëjy yaxpë.

Ta ko ojts xyëënyë byernës, ta Jesús ojts yajmënejxy mä nety të tyuˈukmuktë tuk grupë wintsëndëjk, tyäˈädë grupë ja yajtijy Sanedrin. Jam ojts tˈëmuk tkäjxmuktë wiˈix ttunäˈändë Jesús. Ta ojts tmënëjxtë mä Ponsyʉ Pilatʉ ja gobernadoor diˈibë nety anaˈamp nëˈënë yˈit lyugäärë Judeeʉ.

Ta tˈanmääytyë Pilatʉ: Tyäˈädë yëˈë tuˈugë axëkjäˈäy, waˈan tˈooky. Pilatʉ ta tijatyë Jesús dyajtëëjy ets ko dyajtëëdääjy ta jyënany: Ëjts kyajts ti pyoky mbatë tyäˈädë yetyëjk. Ta net tkejxyë Jesús ets yajmënëjxët mä Eroodʉs Antipʉ, diˈib anaˈamp Galileeʉ per jam yˈity Jerusalén. Yëˈë nan kyaj ojts tpatë Jesusë pyoky, ta tkajxëmbijty mä Pilatʉ.

Pilatʉ nyasmatsëyanë Jesús, per ja myëtsipëtyë Jesús yëˈë tsyojktë ets yajnasmatsëdë wiinkpë tsimy jyaˈay, ja Barrabás diˈib maˈtsp. Ta netë Pilatʉ dyajpëtseemyë Jesús naa kijkxyëëjën. Ets ta tˈanmääjy ja jäˈäyëty: ¡Ixtë ja mrey! Per ja saserdotë diˈib wintsënˈäjttëp ta yaxkaktë: ¡Yajjëgaˈak! ¡Yaˈook! Ta ja Barrabás yˈawäˈätspëtseemy, etsë Jesús ta ojts yajmënejxy ets yˈoogët.

Ja nety byernës kijkxyënaxy ko ojts yajkëxwojpnë kepykyëjxyë Jesús, ets pyëˈääjy byëˈääjy yajkëxwojptë nandëˈënë axëkjäˈäy ets yˈooktët. Jam mä dibujë kyaj kyëxeˈeky. Kyajnëmë netyë Jesús yˈooky ko tuˈuk ja axëkjäˈäy yˈanmääyë: Xyjamyatsëbëts ko nety mdëkë anaˈambë. Jesús ta yˈatsoojy: Ndukwandakypy ko mjamˈatëbë nety mijts mët ëjts mä ja it lugäärë tsujpë.

¿Këdii mëk oy diˈib yajtukwandak? ¿Mnijäˈäp diˈibë it lugäärë tsujpë myaytyakë Jesús? ¿Mä Dios ojts tˈokpëjtakpë ja it lugäärë tsujpë? Yä Naxwiiny. Ets ko Jesús yˈanaˈamët tsäjpotm, ta dyajpëdëˈëgäˈänyë tyäˈädë yetyëjk, ets jyotkujkˈatët mä ja jembyë it lugäärë tsujpë yä Naxwiiny. ¿Këdii jantsy oy dëˈën ttunäˈäny?