KOTO ña̱ kúú yóʼo. Xáʼnína ta̱ Jesús. Ka̱nina clavo ndaʼa̱ra xíʼin xa̱ʼara, ta ka̱tikaanara ndaʼa̱ yitu̱n. ¿Ndachun kúni̱na kaʼnínara?

Saáchi íyo savana sáa̱-ini xíniñaʼá. ¿Á xíni̱ún ndáana kúúna? Ta̱ ángel ta̱ naní Satanás á ta̱ Ndi̱va̱ʼa kúú iin ta̱ sáa̱-ini xíniñaʼá. Ta̱yóʼo kúú ta̱ sa̱ndáʼvi ta̱ Adán xíʼin ñá Eva ña̱ kǒo níkandíxakana ña̱ káʼa̱n Jehová. Ta chi̱ka̱a̱tura xi̱ní na̱ yiví ña̱ kaʼnína ta̱ Jesús.

Siʼna i̱xandi̱va̱ʼana xíʼinra saáví ka̱tikaanara ndaʼa̱ yitu̱n. ¿Á ndákaʼún tá ki̱xina ti̱innara ña̱ Getsemaní ta ku̱a̱ʼa̱nra xíʼinna? ¿Ndáana kúú na̱ ki̱xi yóʼo? Na̱ su̱tu̱ kúú na̱ ki̱xi ti̱inñaʼá. Ná kotoyó ndáaña kúú vitin.

Tá ti̱innara ku̱a̱ʼa̱nra xíʼinna, na̱ apóstol na̱ xi̱nuva kúúna. Ni̱yi̱ʼvínína ta̱ nda̱koonara xíʼin na̱yóʼo. Soo ta̱ Pedro xíʼin ta̱ Juan yatinva ndíku̱nna ku̱a̱ʼa̱nna sa̱tána ña̱ kunina ndáaña keʼéna xíʼinra.

Na̱ su̱tu̱ nda̱kiʼinna ta̱ Jesús ku̱a̱ʼa̱nra xíʼinna nu̱ú ta̱ xi̱kuu su̱tu̱ káʼnu ta̱ naní Anás. Yóʼo loʼova tiempo xi̱ñuʼuna xíʼinra. Tándi̱ʼi nda̱kiʼinnara ku̱a̱ʼa̱n xíʼinna chí veʼe ta̱ Caifás, chi ta̱yóʼo kúú su̱tu̱ káʼnu vitin. Ta ku̱a̱ʼání na̱ su̱tu̱ ñúʼu yóʼo.

Veʼe ta̱ Caifás tíinna ku̱a̱chi xíʼin ta̱ Jesús. Ki̱xa̱a̱ sava na̱ testigo xíʼinna ña̱ chika̱a̱na ku̱a̱chi síkí ta̱ Jesús. Ndiʼi na̱ su̱tu̱ yóʼo káchina: ʼXíniñúʼu kuvi ta̱ Jesúsʼ. Tasaá kóndaana ta̱sií yu̱ʼu̱na nu̱úra ta káninara.

Tá kéʼéna ndiʼi ña̱yóʼo xíʼin ta̱ Jesús, ta̱ Pedro chí ke̱ʼe veʼe ta̱ su̱tu̱ níndichira. Tá ñu̱ú saá vi̱xinní, ta̱ na̱ yiví nda̱kaʼmina ñuʼu̱ ndása̱ána. Tá ndítana nu̱ú xíxi ñuʼu̱ yóʼo, iin ñá káchíñu nu̱ú ta̱ su̱tu̱ Caifás tá xi̱niñá ta̱ Pedro, káchiñá: ʼTa̱ ítáʼan xíʼin ta̱ Jesús kúútu ta̱yóʼovaʼ.

ʼSu̱ví ña̱ nda̱a̱ kúúña, kǒo xíni̱i̱ ta̱ Jesúsʼ, káchi ta̱ Pedro.

U̱ni̱ yichi̱ ni̱ka̱ʼa̱nna xíʼin ta̱ Pedro ña̱ xi̱nina ítáʼanra xíʼin ta̱ Jesús. Soo u̱ni̱ saá yichi̱ ni̱ka̱ʼa̱nra ña̱ kǒo xínira ta̱yóʼo. Ña̱ yichi̱ u̱ni̱ ta̱ Jesús ndi̱kóko̱ora ta̱ xi̱tora nu̱ú ta̱ Pedro. Ta̱yóʼo nda̱kavaní-inira xa̱ʼa ña̱ kǒo ni̱ka̱ʼa̱nra ña̱ nda̱a̱, ki̱tara ku̱a̱ʼa̱nra ta ki̱xaʼára xákura.

Tá ni̱tu̱vi ki̱vi̱ viernes, ku̱a̱ʼa̱n ta̱ Jesús xíʼin na̱ su̱tu̱ nu̱ú ndátakana tíinna ku̱a̱chi. Yóʼo nátúʼun xíʼin táʼanna xa̱ʼa ta̱ Jesús ndáaña keʼéna xíʼinra. Ta ku̱a̱ʼa̱nra xíʼinna nu̱ú ta̱ Poncio Pilato ta̱ xáʼndachíñu chí ñuu Judá.

ʼTa̱yóʼo su̱ví ta̱ va̱ʼa kúúra, xíniñúʼu kuviraʼ, káchina xíʼin ta̱ Pilato. Tándi̱ʼi ki̱xaʼá ta̱ Pilato ndáka̱tu̱ʼunra ta̱ Jesús, tasaá ni̱ka̱ʼa̱nra xíʼinna: ʼTa̱yóʼo kǒo ku̱a̱chira níndaniʼíi̱ʼ. Ta ni̱ka̱ʼa̱nra ná ku̱ʼu̱n ta̱ Jesús xíʼinna nu̱ú ta̱ Herodes Antipas. Ta̱ xáʼndachíñu chí ñuu Galilea kúúra, soo vitin ñuu Jerusalén ki̱xa̱a̱ra. Ni ta̱yóʼo kǒo ku̱a̱chi ta̱ Jesús níndaniʼíra, ta sa̱ndíkoora ta̱ Jesús nu̱ú ta̱ Pilato.

Ta̱ Pilato kúni̱ra sañára ta̱ Jesús. Soo na̱ sáa̱-ini xíniñaʼá kúni̱na ná kita ta̱ kui̱ʼná ta̱ ndíka̱a̱ veʼeka̱a ta̱ naní Barrabás. Ta vitin xa̱sava ki̱vi̱ kúúña ta̱ Pilato ta̱vára ta̱ Jesús ña̱ va̱ʼa ná kuninara. Ta̱ Pilato káʼa̱nra xíʼinna: ʼKotondó, ta̱ reyndóʼ. Soo na̱ su̱tu̱, káchina: ʼKaʼníra, kaʼníraʼ. Tasaá sa̱ñávana ta̱ Barrabás, ta̱ nda̱kiʼinna ta̱ Jesús ku̱a̱ʼa̱n xíʼinna kaʼnína.

Tá xi̱ku̱aá viernes ka̱tikaanara ndaʼa̱ yitu̱n. Ka̱tikaatuna u̱vi̱ na̱ kui̱ʼná ña̱ kuvina xíʼinra, iinra chi ndaʼa̱ kúaʼara ta inkara chi ndaʼa̱ yítinra, kǒona va̱xi nu̱ú na̱ʼná yóʼo. Tá kúma̱níka kuvi ta̱ Jesús, iin ta̱ kui̱ʼná yóʼo ni̱ka̱ʼa̱nra xíʼinra: ʼNdakaʼún xa̱ʼíi̱ tá ná kixaʼún kaʼndachíñúnʼ. Ta̱ Jesús nda̱kuiinra: “Míí ña̱ ndixa káʼi̱n xíʼún: Koún xíʼi̱n nu̱ú ñuʼú livi”.

Va̱ʼaní ña̱ ni̱ka̱ʼa̱n ta̱ Jesús xíʼinra, ¿saá? ¿Á xíni̱ún ndáa ñuʼú livi kúú ña̱ ni̱ka̱ʼa̱nra xa̱ʼa? ¿Míí ni̱xi̱yo ñuʼú livi ña̱ i̱xava̱ʼa Ndióxi̱ tá xa̱ʼa? Nu̱ú Ñuʼú yóʼo ni̱xi̱yoña. Tá ná kaʼndachíñu ta̱ Jesús chí ndiví, saá kúú ña̱ sandátakura ta̱yóʼo ña̱ koora nu̱ú ñuʼú livi.