NYANG’ANISA cinthu cakuipa comwe cinkucitikaci! Jezu akuphedwa. Iwo wamumanika pa muti. Wamukhomerera na perego m’manja na m’minyendo mwace. Thangwe ranyi munthu angadafuna kucitira Jezu bzimwebzi?

Thangwe ndakuti Jezu akhawengedwa. Un’dziwa mbani wakhamuwengawo? M’bodzi ni anjo wakuipa ule, Sathani Dyabu. Ndiye adacitisa kuti Adamu na Eva waleke kubvera Yahova. Ndipo ndiye Sathaniyo omwe adacitisa kuti anyamadulanthaka wa Jezu wacite ciwembo cakuipaci.

Napo pomwe akhanati kuikhidwa pa mutipa, anyamadulanthaka wacewo wakhambamucitira bzinthu mwakusaya nsisi. Unkukumbukira momwe iwo wadabwerera ku zunde la Djetsemani, wacidzamuphata? Kodi anyamadulanthakawo wakhali mbani? Inde, wakhali atsogoleri wa bzipembedzo. Mbatiwone bzomwe bzidadzacitika.

Pomwe Jezu adatengedwa na atsogoleri wa bzipembedzowo, wapostolo wace wadathawa. Wadamusiya Jezu yekha-yekha na anyamadulanthakawo, thangwe wadabva mantha. Tsono wapostolo Pedru na Juwau walibe kuthawira kutali. Iwo wakhambatewera na patali kuti wawone bzomwe bzingadacitiridwa na Jezu.

Wansembewo wadayenda naye Jezu kwa mwamuna wakukalamba, dzina lace, Anasi, omwe akhadatumikira kale ninga mkulu wa ansembe. Thimulo liribe kukhalisa. Patsogolo pace, Jezu adayendesedwa ku mui kwa Kaifasi, omwe akhali mkulu wa ansembe. Atsogoleri wazinji wa bzipembedzo wadakonkhana m’nyumbamo.

M’nyumba mwa Kaifasimo, iwo wadamutonga. Wadabweresedwa wanthu, wacimbadzanamizira Jezu. Atsogoleri wense wa bzipembedzowo, wadati: ‘Jezuyu an’funika kuphedwa.’ Ndipo wakhamupsipira ku nkhope, wacimbamumenya maxoko.

Pomwe bzensebzi bzinkucitika, Pedru akhali m’bwalo la kunja. Kukhadjiedjera usikubo, ndipo wanthu wadagasa moto. Pomwe wakhawotha motoyo, mtumiki m’bodzi wacikazi adanyang’anisa Pedru, aciti: ‘Munthuyu akhali pabodzi na Jezu.’

 Pedru adatawira, aciti: ‘Ne, ndikhali lini naye ine!’

Wanthu wadalewa katatu-kense kuti Pedru akhali pabodzi na Jezu. Tsono nthawe zensenezo Pedru adagaza. Pedru pakugaza pomwe kacitatuko, Jezu adazungunuka, acimunyang’anisa. Pedru adasunama kwene-kwene thangwe ra kunama kwaceko, ndipo adacoka, acikalira mwakusunama.

Pomwe dzuwa likhacoka ku macibese kwa Cixanu, wansembe wale wadamutenga Jezu, waciyenda naye ku mbuto ikulu ya mkonkhano, Nyumba ya Sinedriyo. Kumweko iwo wadabverana bzomwe wangadacita naye. Wadamuyendesa kwa Ponsiyo Pirato, mtongi wa gawo la ku Judeya.

Wansembewo wadati kwa Pirato: ‘Munthuyu ngwakuipa. Iye an’funika kuphedwa.’ Atamala Pirato kupasa mibvunzo Jezu, iye adati: ‘Ndinkucisaya cakuipa comwe munthuyu wacita.’ Ndipo Pirato adatumiza Jezu kwa Herode Antipa. Herode akhali mtongi wa ku Galileya, tsono nthawe imweyo iye akhakhala ku Jeruzalemu. Herode adacisayambo cakuipa comwe Jezu akhadacita, tenepo adamubwezera kwa Pirato.

Pirato akhafuna kutsudzula Jezu. Tsono anyamadulanthaka wa Jezu wakhafuna kuti atsudzulidwe ni munthu munango m’mbuto mwa Jezu. Munthuyo akhali kapondo, dzina lace akhali Baraba. Ndipo tsapano kukhali masikati caiyo pomwe Pirato adabweresa Jezu panja. Iye adati kwa mbumba: ‘Onani! Mambo wanu uyu!’ Tsono akulu-akulu wa ansembe wadakuwa na ukali kuti: ‘Ndokoni naye! Mupheni! Mupheni!’ Tenepo Pirato adatsudzulisa Baraba, ndipo iwo wadamutenga Jezu kuti wakamuphe.

Ku maulo kwa Cixanuco, Jezu adakhomereredwa pa muti. Iwepo ungamuwone pa cithunzi-thunzipa. Tsono ku mbali ziwiri za Jezu, kukhana akapondo awiri womwe wadakhomereredwambo pa muti kuti wafe. M’nthawe ing’ono-ng’ono Jezu akanati kufa, kapondo m’bodzi adati: ‘Dzandikumbukireni mukadzapita mu umambo bwanu.’ Ndipo Jezu adatawira, aciti: ‘Ndinkukupicira kuti un’dzakhala nane m’Paraizo.’

Kodi si piciro labwino limweri? Un’dziwa kuti Jezu akhalewa bza paraizo uponi? Kodi paraizo omwe Mulungu adakonza pakuyambirira ule, ukhali kuponi? Inde, akhali pansi pano. Ndipo, Jezu akadzatonga ninga mambo kudzuluku, iye an’dzabweresa ku moyo munthuyo kuti adzapfatse na moyo m’Paraizo upsa, pansi pano. Kodi tin’funika lini kukondwe na bzimwebzo?