HYANDI te mä tsꞌo tꞌo̱tꞌe bi tꞌo̱tꞌpäbi rä Hesu. Pa bi tho bi tsꞌu̱ti ha nꞌa zaa. Bi rꞌo̱ꞌmbäbi yä klabo ha yä yꞌe̱ ꞌne ha yä ua. ¿Toꞌo näꞌä nda nduxte bi ne bi tꞌo̱tꞌpäbi njabu̱ rä Hesu?

Mi ꞌmu̱i nuꞌu̱ toꞌo xa mi u̱tsa rä Hesu. ¿Gi pädi toꞌoꞌu̱? Nꞌa de geꞌu̱ mi näꞌä tsꞌo e̱nxe̱ rä thuhu Zithu, tꞌembi ꞌnehe Diablo. Go geꞌä bi japi Adan ꞌne Eba himbi yꞌo̱te Jeoba. Näꞌä Zithu, go geꞌä ꞌnehe bi japi nuꞌu̱ yä tsꞌo jäꞌi bi hyo rä Hesu.

¿Gi beni ge nuꞌu̱ yä nkontra bi ma ha rä uädri Jetsemäni pa bi zitsꞌi rä Hesu? Änte de xä tsꞌu̱ti rä Hesu ha nꞌa zaa, nuꞌu̱ yä nkontra xa bi yꞌo̱tpäbi näꞌä go bi neꞌu̱. ¿Toꞌo nuꞌu̱ yä nkontra? Mi geꞌu̱ nuꞌu̱ yä jäꞌi mi gu̱tꞌi rä ꞌñuu ha rä templo. Ma gä handihu̱ te bi thogi mꞌe̱fa.

Nuꞌmu̱ nuꞌu̱ yä jäꞌi bi zitsꞌi rä Hesu, nuꞌu̱ yä apostol xa bi ntsu hänge bi nextꞌi bi ma, ꞌne bi zohnise̱ rä Hesu ko nuꞌu̱ yä nkontra. Pe Pedro ꞌne Juan bi mꞌe̱fa zi yabu̱tho pa bi hyandi te bi thogi ko rä Hesu.

Nuꞌu̱ yä majhä bi zitsꞌi rä Hesu ko näꞌä xita Anäs, nuni xki mpe̱fi de gä däta majhä. Gatꞌho nuꞌu̱ yä jäꞌi xki muntsꞌi himbi do̱ꞌmi ndunthi. Bi tsꞌitsꞌi rä Hesu ha rä ngu näꞌä däta majhä Kaifas. Ja gehni xki muntsꞌi ndunthi de nuꞌu̱ yä jäꞌi mi gu̱tꞌi rä ꞌñuu ha templo.

Ha rä ngu Kaifas ja bi njani näꞌä nthanhñä. Bä tsꞌii rꞌa yä ñꞌo̱ho̱ pa bi mää de rä Hesu rꞌa yä nhemhñä o nkꞌuamba. Gatꞌho nuꞌu̱ yä majhä bi ꞌñenä: “Te pe̱ꞌtsi gä hohu̱ rä Hesu”. ꞌNepu̱ nuꞌu̱ yä jäꞌi bi zotsꞌi rä Hesu ꞌne bi me̱tꞌi.

Mientra rä Hesu mi thogi njabu̱, Pedro mi ꞌmai ha rä patio. Näꞌä xuiꞌä xa mi xä tse̱ hänge nuꞌu̱ yä jäꞌi xki tso̱ge rä tsibi, ꞌne mi mpaꞌti. Pe nꞌa de nuꞌu̱ yä ꞌme̱hñä mi mpe̱fi ha näꞌä nguu bi hyandi Pedro ꞌne bi ꞌñenä: “Nuni ñꞌo̱ho̱ mi ñꞌoui ꞌnehe rä Hesu”.

Pedro bi dädi: “Hinä nuga hingo ndi ñꞌoꞌmegani”.

Po hñu mꞌiki yä jäꞌi bi xipi Pedro ge hää mi ñꞌoui rä Hesu. Pe näꞌä bi ꞌñenä ge hinä. Ha näꞌä rä hñu mꞌiki, rä Hesu bi ñegi ꞌne bi hyandi hanja Pedro mi enä ge himi pädi rä Hesu. Nubye̱, Pedro xa bi durämu̱i ngeꞌä xki go̱ni rä Hesu, ꞌne bi ma bä hudi bä nzoni.

Mi hyatsꞌi näꞌä mbehe, nuꞌu̱ yä majhä bi zitsꞌi rä Hesu pa habu̱ mi muntsꞌi, näꞌä luga mi tꞌembi Sanedrin. Ja gehni ma xä nuu te xä me̱fi ko rä Hesu. ꞌNepu̱ bi tsꞌitsꞌi ko Ponsio Pilato näꞌä ndä de rä hnini Judea.

Nuꞌu̱ yä majhä bi ꞌñembäbi Pilato: “Nuni nꞌa tsꞌo ñꞌo̱ho̱. Pe̱ꞌtsi te dä du”. Pilato bi yꞌo̱tpäbi yä ntꞌani rä Hesu, ꞌnepu̱ bi ꞌñenä: “Nuga hinte mä tsꞌoki di timbäbigani”. ꞌNepu̱ Pilato bi mända ge xä tsꞌitsꞌi rä Hesu ko Erodes Antipas, näꞌä ndä de Galilea mi yꞌo ha Jerusalen. Erodes ꞌnehe hinte mä tsꞌoki bi dimbäbi rä Hesu, ꞌne bi me̱hni mänꞌaki ko Pilato.

Pilato mi ne dä hye̱gi dä ma rä Hesu. Pe nuꞌu̱ yä nkontra rä Hesu mi ne ge Pilato go xä hyopi xä bo̱ni näꞌä be mi rä thuhu Barrabas. Änte de mäde mä pa, Pilato bi gu̱ki rä Hesu ꞌne bi ꞌñembäbi yä jäꞌi: “¡Hyanthu̱! ¡Xi ꞌmakua ri ndähu̱!”. Pe nuꞌu̱ yä majhä bi dädi: “¡Käꞌmi de gepu̱ ꞌne hyo! ¡Pe̱ꞌtsi te gi hyo!”. Njabu̱, Pilato bi hyopi bi bo̱ni Barrabas, pe rä Hesu bi tsꞌitsꞌi pa dä tho.

Näꞌä mbehe ngu mäde mä pa, rä Hesu bi tsꞌu̱ti ha nꞌa zaa. Ha rä kꞌoi hindi nheki, pe ꞌnehe bi tsꞌu̱ti mä yoho yä yꞌofadi pa bi tho. Änte de xä du rä Hesu, nꞌa de nuꞌu̱ yä yꞌofadi bi ꞌñembi rä Hesu: “Bengägi nuꞌmu̱ xki ku̱tꞌi ha ri tsꞌu̱tꞌhui”. Rä Hesu bi dädi: “Nuga di xiꞌi, ma gi ꞌmu̱i kongeki ha Paraiso o Uädri”.

¿Hänge xa xä ñho näꞌä bi xipi rä Hesu näꞌä yꞌofadi? ¿Gi pädi te mä paraiso bi mää rä Hesu? ¿Habu̱ mi kohi näꞌä paraiso bi hyoki Äjuä ri mu̱di? Hää, näꞌä paraiso mi kohi nuua ha rä Xiꞌmhai. Nuꞌmu̱ xti mända rä Hesu ha mähetsꞌi, ma dä gu̱tsꞌi de rä du näꞌä yꞌofadi pa dä mꞌu̱i ha näꞌä rꞌayꞌo Uädri nuua ha rä Xiꞌmhai. ¿Hänge xa xä ñho näꞌä ma dä me̱fi rä Hesu?