KJIKJ mol, waut hia woat! Jesus woat omjebrocht! Dee haben am aun eenen Pol aunjenoagelt un haben de Näajel derch siene Henj un Feet derchjeschloagen. Oba wuarom deeden dee Jesus soo grausom behaundlen?

Daut wia, wiels eenje Jesus schlajcht lieden kunnen. Weetst du, wäa daut wieren? Eena von dee wia Soton, de beesa Fient. Daut wia de beesa Enjel, waut Adam un Eva doatoo veleit haud, Jehova nich mea to jehorchen. Un Soton wia uk dee, waut Jesus siene Fiend doatoo brocht, dise schrakjelje Sach to doonen.

Jesus siene Fiend hauden am aul väl aunjedonen, ea see am aun dän Pol aunjenoagelt hauden. Weetst noch, woo dee no dän Goaden Getsemane kjeemen un am faustneemen? Wäa wieren daut? Daut wieren de judische Leidasch. Well wie mol seenen, waut dee dan met am deeden.

Aus dee Leidasch Jesus faustneemen, kjrieejen de Apostel Angst un kleiwden ut. See leeten Jesus met siene Fiend auleen. Petrus un Johanes randen oba nich wiet wajch. See kjeemen plietsch hinjaraun un kjikjten, waut met Jesus wort.

Daut ieeschte brochten de Priestasch Jesus no Hanas. Daut wia een oola Maun, waut mol ea wia de Huaga Priesta jewast. Een Stootje lota brochten dee Jesus dan no Kaifas, waut to dee Tiet de Huaga Priesta wia. Doasoo wieren väle judische Leidasch toopjekomen.

Hia bie Kaifas hilden see een Jerecht auf. See leeten Menschen komen, waut äwa Jesus Läajes vetalen sullen. De judische Leidasch säden aula: ‘Jesus haft dän Doot vedeent!’ Dan kjwielden see am em Jesecht un schluagen am met de Fusten.

Äwa aul dit wia Petrus vere Däa em Bennahoff. Daut wia eene kolde Nacht, un soo muaken de Menschen doa een Fia. Aus see sikj doa aula rom daut Fia woamen deeden, kjikjt eene Deenstmejal no Petrus un säd: ‘Disa wia uk met Jesus toop.’

‘Nä’, säd Petrus, ‘daut es nich soo!’

Dree Mol säd doa wäa, Petrus wia uk met Jesus toop jewast. Oba Petrus säd jiedatsmol, daut wia nich soo. Biem dredde Mol dreid Jesus sikj om un kjikjt Petrus aun. Petrus wia daut grulich leet, daut hee jeloagen haud. Hee jinkj wajch un road.

Friedach zemorjes met Sonnoppgank brochten de Priestasch Jesus no daut groote Vesaumlungshus, wua see emma toopkjeemen. Hia beräden see sikj, waut see met Jesus doonen wullen. Dan brochten see am no Pontius Pilatus, dän Harscha von Judäa.

‘Dit es een schlajchta Mensch’, säden see to Pilatus. ‘Dee haft dän Doot vedeent.’ Aus Pilatus Jesus ieescht een bät utjefroacht haud, säd hee: ‘Ekj kaun aun disen Mensch nuscht orrajchtet finjen.’ Pilatus schekjt Jesus no Herodes Antipas. Herodes wia de Harscha von Galiläa, oba dee wia jroz en Jerusalem. Herodes kunn uk nuscht orrajchtet aun Jesus finjen un schekjt am wada trigj no Pilatus.

Pilatus wull Jesus jieren frieloten. Oba Jesus siene Fiend wullen haben, Pilatus sull leewa eenen aundren Jefangnen frieloten. Daut wia de Reiba Barabas. Ojjefäa bie Meddach rom brocht Pilatus Jesus rut ver daut Volkj un säd: ‘Kjikjt mol! Jun Kjennich!’ Oba de väaschte Priestasch schrieejen loos: ‘Fuat met dän! Lot dän ombrinjen! Lot dän ombrinjen!’ Un soo leet Pilatus Barabas frie, Jesus oba leet hee wajchbrinjen, daut dee omjebrocht wort.

Aum Friedach tiedich no Meddach wort Jesus aun eenen Pol aunjenoagelt. Opp daut Bilt es daut nich to seenen, oba aun jiedat Sied von Jesus hauden dee noch eenen Reiba aun eenen Pol aunjenoagelt. Jroz ea Jesus storf, säd eena von de Reiba to am: ‘Denkj aun mie, wan du en dien Kjennichrikj nenkjemst.’ Un Jesus säd: ‘Ekj vespräakj die, du woascht met mie em Paradies sennen.’

Wia daut nich een scheenet Vespräakjen? Weetst du, waut fa een Paradies Jesus hia meend? Wua wia daut Paradies, waut Gott aum Aunfank jemoakt haud? Na, daut wia hia oppe Ieed. Aus Kjennich em Himmel woat Jesus disen Maun wada toom läwen brinjen un dee woat kjennen en daut niee Paradies oppe Ieed läwen. Es daut nich scheen?