¡CHAWILAMPEʼ ri itzelal tijan kbʼanik! Tijan kkekamsaj ri Jesús. Xtzaybʼax che jun cheʼ. Kʼo täq klawux kojom che ri täq uqʼabʼ xuqujeʼ che ri täq raqan. ¿Suche kkaj kkebʼan wariʼ che?

Rumal che nikʼaj täq winaq itzel kkilo. ¿La awetaʼm e jachin täq? Jun chike are jun Itzel ángel ubʼiʼ Satanás. Are xubʼan che ri Adán rukʼ Eva xeniman ta che Jehová. Xuqujeʼ are Satanás xubʼano che ri täq ukʼulel ri Jesús xkebʼan jun nimalaj itzelal.

Chiʼ majaʼ na kketzeybʼa che ri cheʼ, ri täq ukʼulel ri Jesús xkebʼan täq kʼäx che. ¿La xsach ta pa ajolom che xepe pa ri Getsemaní tekʼuriʼ xkekʼam bʼik? ¿E jachin laʼ ri täq ukʼulel? Jeʼ e are täq ri ajkʼamal bʼe. Chqilampeʼ su xbʼanik.

Chiʼ ri täq ajkʼamal bʼe xkekʼam bʼi ri Jesús, ri täq apóstoles xeʼanmajik. Xkexibʼij kibʼ, xkeya kan utukel, o utikel, kukʼ ri täq ukʼulel. Tekʼuriʼ ri täq apóstoles Pedro xuqujeʼ Juan naj täj xebʼe wi. Xetereʼ bʼi che urilik su kbʼan che ri Jesús.

Ri täq ajkojol tabʼal toqʼobʼ xkekʼam bʼi ri Jesús che ri Anás, che ojer xubʼan ajkojol tabʼal toqʼobʼ. Ri täq winaq naj täj xekanaj kan waral. Tekʼuriʼ xkekʼam bʼi ri Jesús pa rachoch Caifás, are ajkojol tabʼal toqʼobʼ kimik. E kʼo e kʼi täq ajkʼamal bʼe chilaʼ.

Waral pa rachoch Caifás xbʼan jun qʼatbʼaltzij. Xkekʼam lo nikʼaj achijabʼ rech kkemol tzij chirij ri Jesús. Konojel ri täq ajkʼamal bʼe xkebʼij wariʼ: ‹Rajawaxik che kkamsax ri Jesús›, xechaʼ. Tekʼuriʼ xkechubʼaj upalaj ri Jesús, xuqujeʼ xkechʼayo.

Chiʼ tijan kbʼan wariʼ, Pedro kʼo chuwäch ri ja. Che wajun chaqʼabʼ riʼ tijan kubʼan tew, ri winaq xkekoj kiqʼaqʼ. Chiʼ tijan kkemiqʼ kibʼ chuwäch ri qʼaqʼ, jun ixoq ajmos xril ri Pedro tekʼuriʼ xubʼij: ‹Wajun achi riʼ xuqujeʼ kʼo rukʼ ri Jesús›, xchaʼ.

‹¡Qastzij täj, in kʼo ta rukʼ ri Jesús!› Xchaʼ Pedro.

Oxibʼ mul xkebʼij ri winaq che ri Pedro kʼo rukʼ ri Jesús. Tekʼuriʼ xubʼij che wa oxibʼ mul che kʼo ta rukʼ Jesús. Chiʼ Pedro xubʼij che wariʼ che urox mul, Jesús xril loq ri Pedro. Tekʼuriʼ Pedro sibʼalaj xbʼisonik rumal che xubʼij ta ri qastzij, rumal waʼ xbʼek xuqujeʼ xok pa oqʼej.

Chiʼ xsaqarik pa ri qʼij viernes, ri täq ajkojol tabʼal toqʼobʼ xkekʼam bʼi ri Jesús pa ri nim riqbʼal ibʼ kbʼan pa ri ja rech Sanedrín. Chilaʼ kkechomaj wi su kkebʼan che ri Jesús. Xkekʼam bʼi rukʼ Poncio Pilato, ri ajqʼatbʼaltzij rech ri tinamit Judea.

‹Wariʼ jun itzel achi›, xechaʼ che Pilato. ‹Rajawaxik kkamsaxik.› Chiʼ ri Pilato xuta täq tzij che ri Jesús, xubʼij wariʼ: ‹In kinwilo che kʼot itzelal xubʼano›, xchaʼ. Tekʼuriʼ Pilato xubʼano che xkʼam bʼi ri Jesús chuwäch ri Herodes Antipas, ri ajqʼatbʼaltzij rech Galilea, che kʼo Jerusalén. Wajun achi xuqujeʼ xrilo che kʼot umak ri Jesús, tekʼuriʼ xutaq chi bʼi che Pilato.

Pilato xraj che kbʼe ri Jesús. Tekʼuriʼ ri täq ukʼulel ri Jesús kkaj che are kesax bʼi jun chik achi tzʼapalik, are jun elaqʼom ubʼiʼ Barrabás. Kimik naj ta chik kraj kopan nikʼaj qʼij chiʼ ri Pilato xresaj lo ri Jesús chuwäch ri ja. Pilato xubʼij wariʼ chike ri winaq: ‹¡Chiwilampeʼ! ¡Ri ijawinel!› Tekʼuriʼ ri täq ajkojol tabʼal toqʼobʼ xkebʼij: ‹¡Chawesaj che qawäch! ¡Chakamsaj!› Rumal laʼ xyaʼ che Barrabás xel bʼik, tekʼuriʼ xkekʼam bʼi ri Jesús rech kkekamsaj.

Majaʼ na matam pa ri qʼij viernes xketzeybʼa che jun cheʼ. Pa ri wachbʼäl katkun täj keʼawilo, che unaqaj e kʼo kebʼ elaqʼomabʼ rech kekamsaxik. Chiʼ jubʼiqʼ chi kraj ri ukamikal ri Jesús, jun chike ri elaqʼomabʼ xubʼij: ‹Minasach pa ajolom chiʼ katok pa ri ajawbʼäl›, xchaʼ. Tekʼuriʼ Jesús xubʼij: ‹Kinbʼij chawe che katkʼojiʼ wukʼ pa jun kotzʼiʼjalaj uwäch Ulew›, xchaʼ.

¡Sibʼalaj utz ri xubʼij kanoq! ¿La jewaʼ? ¿La awetaʼm sulaʼ ri kotzʼiʼjalaj Ulew tijan kubʼij ri Jesús? ¿Jachiʼ kʼo wi ri kotzʼiʼjalaj Ulew che xubʼan ri Ajawaxel nabʼe kanoq? Jeʼ, cho ruwäch ri Ulew. Tekʼuriʼ chiʼ ri Jesús kubʼan ajawinel pa ri kaj, kuwalsaj wajun achi rech kkʼojiʼ pa ri kʼakʼ kotzʼiʼjalaj uwäch Ulew. ¿La sibʼalaj utz wariʼ?