¡QAWAY kaynataña rurarusqaku! Jesustam wañuchichkanku. Qerupim warkurayachkan. Makinkunapiwan chakinkunapipas clavowan takasqa kachkan. ¿Imanasqataq kaynata ruraytaqa pipas munanman?

Wakin runakunam Jesusta cheqnispanku chaynataqa rurarqaku. ¿Yachankichu pikunataq Jesustaqa cheqnirqaku? Hukninqa mana allin angel Satanas Diablom. Paymi Adantawan Evatapas Diospa contranpi huchallichirqa. Satanasmá Jesuspa enemigonkunata kallpancharqa Jesusta wañuchinankupaq.

Manaraq qerupi warkuchkaspankum enemigonkunaqa Jesusta ñakarichirqaku. ¿Yuyarichkankichu Getsemani huertaman hamuspanku pusarusqankuta? ¿Pikunataq chay enemigonkunaqa karqaku? Paykunaqa Judea lawpi kaq jefenkunam hinaspa sacerdotekunam karqaku. Qawasunchikyá imataq pasarqa.

Chay runakuna Jesusta presocharuspa pusaruptinkum apostolninkunaqa ayqekurqaku. Mancharikuspanku enemigonkunawan Jesustaqa sapallanta saqerurqaku. Ichaqa apostol Pedro hinaspa apostol Juanpas manam pasaypaqtaqa saqerurqakuchu. Karu qepallantam qatirqaku Jesusta imam pasasqanta qawanankupaq.

Chaymantam sacerdotekunapa ñawpaq kaq jefenku Anasman Jesustaqa pusarqaku. Ichaqa manam unaytachu chaypiqa qepakurqaku. Chaymantañataq sacerdotekunapa jefenku Caifaspa wasinman Jesustaqa pusarqaku. Chaypim achkallaña sacerdotekuna chaynataq llaqtapa jefenkunapas karqaku.

Caifaspa wasinpim juiciota rurarqaku. Hinaspa pusamurqaku Jesuspa contranpi llullakuq runakunata. Hinaptinmi judiokunapa kamachiqninkuna, sacerdotekunapa jefenkuna hinaspa Diospa leynin yachachiqninkunapas nirqaku: ‘Jesusta wañurachisunchik’, nispa. Hinaspanmi Jesuspa uyanman toqaspanku takarqaku.

Chaynakunata Jesusta rurachkaptinkum Pedroñataq patiopi kachkarqa. Tuta chiriptinmi runakunaqa ninata ratachirqaku qonipakunankupaq. Hinaptinmi ninapi qonipakuchkaptinku huk sirvienta Pedrota tiyachkaqta rikuruspa nirqa: ‘Kay runapas Jesuspa puriqmasinmi’, nispa.

Pedroñataq nirqa: ‘Manam ñoqaqa kay runawanqa purirqanichu’, nispa.

Kimsa kutikamam runakunaqa Pedrota nirqaku Jesuspa puriqmasin kasqanta. Pedrom ichaqa kimsan kutipi mana reqsisqanta nirqa. Kimsa kaq kutipi Pedro chaynata niruptinmi Jesusqa muyuriykuspa Pedrota qawariykurqa. Hinaptinmi payqa llakikururqa llullakusqanmanta hinaspa hawaman pasakuspa aminankama waqakurqa.

Viernes achikyaqtam sacerdotekunaqa huñunakunanku Corteman Jesustaqa pusarurqaku. Chaypim tanteanakurqaku Jesusta ima ruranankupaq. Chaymantam Judea llaqtapi kamachikuq Pilatoman aparurqaku.

Hinaspam nirqaku: ‘Kay runaqa mana allin ruraq runam. Wañurachisunchik’, nispa. Pilatoñataqmi Jesusta tapupayaruspan nirqa: ‘Ima mana allintañataq payqa rurarurqa’, nispa. Hinaspam Pilatoqa Galilea lawpi kamachikuq Herodesman pusachirqa, Herodesqa Jerusalenpim kachkarqa. Paypas Jesuspa ima faltantapas mana tarispanmi kasqallan Pilatoman kutichirqa.

Chaymi Pilatoqa Jesusta kachaykuyta munarqa. Jesuspa enemigonkunam ichaqa salteaq Barrabasta kachaykunanta munarqaku. Chaymi Pilatoqa yaqa chawpi punchawtam Jesusta hawaman horqorurqa. Hinaspa runakunata nirqa: ‘¡Kayqaya reynikichikqa!’ nispa. Sacerdotekunapa jefenkunañataq qaparkacharqaku: ‘¡Wañuchun, wañuchun!’ nispa. Chaynapimá Barrabasta kacharirqaku, Jesustañataqmi pusarurqaku wañuchinankupaq.

Viernes tarde lawtam qerupi warkururqaku. Hinaptinpas Jesuspa alleq lawninpi chaynataq ichoq lawninpi mana allin ruraq runakunata warkururqaku, dibujopiqa manam rikunkichu. Chaymi Jesus wañunayachkaptin waqtanpi kaq mana allin runakunamanta hukninmi nirqa: ‘Munaychakusqaykiman chayaspaykiqa yuyarillawankimá’, nispa. Chaymi Jesusñataq nirqa: ‘Cheqaptam niki, ñoqawanmi kanki paraisopi’, nispa.

¡Ima sumaq suyakuymi chayqa! ¿aw? ¿Yachankichu ima paraisomantataq Jesusqa rimachkarqa? ¿Maypitaq Diospa rurasqan paraisoqa kachkarqa? Allpapimá. Chaymi Jesusqa hanaq pachamanta kamachikamuptin Allpapi Paraiso kaptin chay runata kawsarichinqa chaypi kawsakunanpaq. ¿Manachu chayqa kusikunapaq?