LUKU na ogri sani di e pasa dya! Den kiri Yesus. Den anga en na wan postu. Spikri naki go na ini en anu nanga futu. Fu san ede wan sma ben sa wani du disi nanga Yesus?

Na fu di son sma no man si Yesus na ai. Yu sabi suma na den sma dati? Wan fu den na a ogri engel Satan Didibri. Na en ben tyari Adam nanga Eva go so fara fu trangayesi Yehovah. Na Satan na a sma di ben tyari den feanti fu Yesus go so fara fu du a takru sani disi.

Srefi bifo den ben spikri Yesus dya na a postu, den feanti fu en ben handri takru nanga en. Yu e memre ete fa den ben kon na a dyari fu Getseimanei èn ben tyari en gowe? Suma ben de den feanti dati? Iya, den ben de den kerki fesiman. We, meki wi go luku san ben pasa baka dati.

Te den kerki fesiman e kisi Yesus, dan den apostel e lon gowe. Den e libi Yesus wawan nanga en feanti, bika den kon frede. Ma den apostel Petrus nanga Yohanes no e go tumusi farawe. Den e waka wan pikinso na baka fu si san e pasa nanga Yesus.

Den priester e tyari Yesus go na a grani man Anas, di ben de granpriester fosi. Na ipi sma no e tan dya langa. Fu drape den e tyari Yesus go na a oso fu Kayafas, di de a granpriester now. Furu kerki fesiman kon makandra na en oso.

Dya na a oso fu Kayafas den e hori wan krutu. Den e tyari sma kon na inisei, di e fruteri lei fu Yesus. Ala den kerki fesiman e taki: ’Yesus musu dede.’ Dan den e spiti na en fesi èn e naki en nanga den kofu.

Aladi ala den sani disi e pasa, dan Petrus de na dorosei na ini a prasi. A de wan kowru neti, èn fu dati ede den sma e meki wan faya. Aladi den sidon na lontu a waran faya, dan wan uma-futuboi e luku Petrus èn e taki: ’A man disi ben de tu nanga Yesus.’

’Nôno, a no mi!’ Petrus e piki.

Dri tron wan sma e taigi Petrus taki a ben de nanga Yesus. Ma ala tron Petrus e taki dati a no tru. Te Petrus e taki disi fu a di fu dri tron, dan Yesus e drai luku en. Petrus e sari srefisrefi taki a ben taki den lei disi. A e gowe èn a e krei.

Freida mamanten fruku te son opo, dan den priester e tyari Yesus go na a bigi konmakandra-presi fu den, a Sanhedrin zaal. Dyaso den e taki nanga makandra san den o du nanga Yesus. Den e tyari en go na Pontius Pilatus, a tiriman fu Yudea.

’Yesus na wan takru sma’, den priester e taigi Pilatus. ’A musu dede.’ Baka di Pilatus ben aksi Yesus wan tu aksi, a e taki: ’Mi no kan feni fowtu na en.’ Dan Pilatus e seni Yesus go na Herodes Antipas. Herodes na a tiriman fu Galilea, ma nownow a de na Yerusalem. Herodes no man feni fowtu tu na Yesus; fu dati ede a e seni en go baka na Pilatus.

Pilatus wani fu lusu Yesus. Ma den feanti fu Yesus wani, taki Pilatus lusu wan tra strafuman. A man disi na a fufuruman Barabas. A de bakadina now, te Pilatus e tyari Yesus go na dorosei. A e taigi a pipel: ’Luku! A kownu fu unu!’ Ma den granpriester e bari tranga taki: ’Puru en na pasi! Kiri en! Kiri en!’ Fu dati ede Pilatus e lusu Barabas èn den e tyari Yesus gowe fu kiri en.

Freida bakadina fruku den e spikri Yesus na wan postu. Yu no kan si den na tapu a prenki, ma na a reti-anusei èn na a kruktu-anusei fu Yesus, yu abi wan ogriman di den e kiri tu na wan postu. Syatu bifo Yesus dede, dan wan fu den ogriman e taigi en: ’Memre mi te yu kon na yu kownukondre.’ Yesus e piki en: ’Mi e pramisi yu, taki yu sa de nanga mi na ini Paradijs.’

Dati na wan moi pramisi, a no so? Yu sabi fu sortu paradijs Yesus e taki? Pe a paradijs ben de di Gado ben meki biginbigin? Iya, na grontapu. Èn te Yesus e tiri na hemel leki kownu, dan a sa meki a man disi kon baka na libi fu kan nyan bun fu a nyun Paradijs na grontapu. Wi no musu prisiri fu dati?