¡ATAYÁÁ!, xtáa rarígá dí raʼkhí kayuʼ. Kuwa ruxiyáa Jesús. Gruajkamaa náa mbá ixi̱. Kiʼdujmaa clavo náa ñawúunʼ ga̱jma̱a̱ náa rajkúu. Náa numuu rí nuni rígi̱ tikhun xa̱bu̱ rá.

Numuu rí xa̱bu̱ nakiʼníin kuyáá mbanda̱ʼkho kayuʼ. Lá natayáá tsíin ñajúnʼ xa̱bu̱ bugi̱ ráʼ. Mbáa dí ikhiin nindxu̱u̱ ángel bi̱ ra̱májánʼ wéñuʼ bi̱ nagumbiʼyuu Satanás bi̱ ñajunʼ Gixa̱a̱ ma̱ngaa. Ikhaa niʼngo̱o̱ niʼni rí Adán ga̱jma̱a̱ Eva xúnimbu̱u̱n kuyáá Jeobá. Satanás niʼngo̱o̱ niʼni rí xa̱bu̱ ḇi guáʼdáá sia̱nʼ náa Jesús muni dí ra̱májánʼ wéñuʼ.

Mú nákhi xóo tsewadujmaa náa ixi̱, xa̱bu̱ bi̱ guáʼdáá sia̱nʼ náa Jesús nuni dí ra̱májánʼ wéñuʼ. Lá narmáʼáan a̱jkia̱nʼ rí xa̱bu̱ bugi̱ niguwáʼ náa ixi̱ ri̱ʼi̱ dí rígá náa Getsemaní mu magun kuya̱a̱ ráʼ. Tsíin ñajúnʼ xa̱bu̱ sia̱nʼ bugi̱ rá. Ikhiin ñajúnʼ xa̱bu̱ ede̱. Guʼyáá dí narígá nda̱wa̱á.

Índo̱ rí xa̱bu̱ ede̱ nagún kuya̱a̱ Jesús, apóstoles ndrígóo nagáñun. Namiñun, ikha jngó nuniñaʼ mbáwíi gajmíi̱n xa̱bu̱ bi̱ guáʼdáá sia̱nʼ náa ikhaa. Apóstol Pedro ga̱jma̱a̱ apóstol Juan na̱nguá egun mitsinguánʼ wéñuʼ. Nagún kidxúnʼ xa̱bu̱ mu mbuyáá ndiéjunʼ egiʼnuu Jesús.

Ndxajkun nagún kuya̱a̱ Jesús náa xa̱bu̱ nikhi̱i̱ Anás, bi̱ niyejkha edxu̱u̱ náa ndxajkun. Xa̱bu̱ bi̱ mbaʼin na̱nguá ejñúnʼ wéñuʼ gi̱i̱. Nda̱wa̱á nagún kuya̱a̱ Jesús náa goʼwóo Caifás, bi̱ kayá edxu̱u̱ náa ndxajkun. Kúwi̱i̱n mbaʼin xa̱bu̱ ede̱ ikhí.

Gi̱i̱ náa goʼwóo Caifás nunimbaníí xkujndu. Naguwáʼ kudiin tikhun xa̱bekha mu muthi rí minduwaʼ ga̱jma̱a̱ numuu Jesús. Xúgínʼ xa̱bu̱ ede̱ nuthi: ‹Guxiyáalu Jesús›. Ikhú nixndujtáʼ inu Jesús, ga̱jma̱a̱ nixnáá.

Índo̱ xtáa rarígá xúgíʼ rígi̱, Pedro xtáa náa rexo̱o̱ guʼwá. Mbruʼun rígi̱ naʼni miguwan, ga̱jma̱a̱ xa̱bu̱ nugíiʼ aguʼ. Índo̱ xa̱bu̱ kuwa ratagúnʼ náa gíiʼ aguʼ, mbáa a̱ʼgu̱ bi̱ nañajumbáá ndaʼyoo Pedro ga̱jma̱a̱ naʼthúu̱n: ‹Ma̱ngaa xa̱biya̱ bugi̱ nixtáa ga̱jma̱a̱ Jesús›.

Ikhú Pedro nariʼña: ‹¡Na̱nguá, ikhúúnʼ na̱nguá nixtáá gajmuʼ!›.

Xa̱bu̱ nitháán ajtsú nuthu Pedro rí nixtáa ga̱jma̱a̱ Jesús. Mú mámbá rí nutan Pedro naʼthí rí na̱nguá. Rí maʼni ajtsú nuthu rí Pedro naʼthí, Jesús natanga̱a̱ gáʼyoo. Pedro naxtáa gíná wéñuʼ numuu rí niʼninduwaʼ, ikhú najkha̱a̱ ga̱jma̱a̱ nambiyaʼ.

Miʼcha̱ viernes índo̱ xtáa má ragájnuu A̱jkha̱ʼ, ndxajkun nagún kuya̱a̱ Jesús náa muwi̱i̱n mbaʼin xa̱bu̱ mu muguaʼdáá reunión, rígi̱ narígá náa Sanedrín. Gi̱i̱ gunimbaníí rí guni gajmiún Jesús. Nagun kuya̱a̱ náa Poncio Pilato, bi̱ naʼtáñajunʼ náa mbayuuʼ ndrígóo xuajin Judea.

Xa̱bu̱ nuthán Pilato: ‹Ra̱májánʼ xa̱biya̱ bugi̱. Guxíyáalu›. Nda̱wa̱á rí Pilato niʼniu graxe̱ Jesús, ikhaa naʼthí: ‹Na̱nguá ndiyo̱o̱ rí ikhaa niʼni mbá dí ra̱májánʼ›. Ikhú Pilato naʼni rí magún kuya̱a̱ Jesús náa Herodes Antipas, Xa̱bu̱ Ñajunʼ bi̱ xtáa náa xuajin Galilea, mu ikhú xtáa náa xuajin Jerusalén. Ma̱ngaa xa̱biya̱ bugi̱ ndaʼyoo rí Jesús na̱nguá niʼni mbá dí ra̱májánʼ, ga̱jma̱a̱ naʼni rí maʼga̱a̱ mbu̱júu̱ náa Pilato.

Pilato nandoo maniñuʼ maʼga̱a̱ Jesús. Mú xa̱bu̱ bi̱ guáʼdáá sia̱nʼ náa Jesús nandún rí Pilato maniñuʼ maʼga̱a̱ imba̱a̱ xa̱bu̱ bi̱ gídáʼ náa guʼwá ejua̱nʼ, bi̱ nagumbiʼyuu Barrabás bi̱ naʼni kúwáʼ. Rí xúgi̱ itháan maʼni wakhaʼ índo̱ Pilato nariyaʼ Jesús náa rexo̱o̱ guʼwá. Pilato naʼthúún xa̱bu̱: ‹¡Guya̱a̱! ¡Rey ndrígala!›. Mú ndxajkun bi̱ phú kuya̱ edxu̱u̱ nundxa̱ʼwa̱: ‹¡Nánguá eyuxu gúya̱a̱! ¡Ataxíyáa!›. Xúʼko̱ niʼni rí Barrabás nigájnáa náa guʼwá ejua̱nʼ, ga̱jma̱a̱ Jesús nigún kuya̱a̱ mu muxiyáa.

Wakhíʼ viernes nidujmaa Jesús náa ixi̱. Náa kiʼniriyaʼ xándoo matañu̱u̱n, mú ma̱ngaa náa mámbá nijniúu Jesús nidujmiin náa ixi̱ xa̱bu̱ bi̱ nini dí raʼkhí mu makhañún. Mú nákha xóó tsikhañu Jesús, mbáa bi̱ niʼni dí raʼkhí naʼthí: ‹Garmáʼáan a̱jkia̱nʼ xta̱yo̱ʼ índo̱ gídxáʼ gáratañajunʼ›. Ga̱jma̱a̱ Jesús nariʼña: ‹Natha̱nʼ gajkhun rí maraxtaa ga̱jma̱á ni̱ndxu̱ʼ náa Ku̱ba̱ʼ mitsaan›.

Lá ragájkhun dí ra̱ʼkhá tháán mitsaan rí wíji̱ maʼni Jesús ráʼ. Lá natayáá ndiéjunʼ ñajunʼ ku̱ba̱ʼ mitsaan rí xtáa raʼthí Jesús ráʼ. Náa nirígá ku̱ba̱ʼ mitsaan rí Dios niʼni nákha ginii rá. Xúʼko̱, náa tsu̱du̱u̱ Ku̱ba̱ʼ. Índo̱ Jesús gaʼtañajunʼ asndu náa mekhuíí, makuxi̱i̱ xa̱biya̱ bugi̱ mu maxtáa gagi náa Ku̱ba̱ʼ mitsaan dí marigá nuxi̱ʼ mbu̱júu̱ náa tsu̱du̱u̱ Ku̱ba̱ʼ. Lá ragájkhun dí ra̱ʼkhá tháán májánʼ nindxu̱u̱ rígi̱ ráʼ.