101-нҗи хекая

Исаны өлдүрйәрлер

БОЛЯН горкунч затлара серет. Исаны өлдүрйәрлер. Оны пүрсе чүйледилер. Онуң элини ве аягыны чүйледилер. Исаны ким шейле гынаярка?

Исаны йигренйәнлер бар. Кимдигини билйәңми? Оларың бири Шейтан Иблис. Ол Адам ата билен Хов энәни Ехова гаршы чыкарыпды. Исаны пүрсе чүйледен хем Шейтанды.

Исаны пүрсе чүйлемәнкәлер, душманлары оны масгаралаярлар. Оларың Гетсемани багына гелип, Исаны тутушы ядыңдамы? Олар кимлерди? Догры, олар дини ёлбашчыларды. Гел, соңра нәме боланыны билели.

Дини ёлбашчылар Исаны тутанда, ресуллары горкуп, оны еке гоюп гачярлар. Голайда диңе Петрус билен Яхя ресул галяр. Олар Иса нәме боланыны билмек үчин ызы билен гидйәрлер.

Исаны озал баш руханы болан Ханна атлы бир яшулының янына элтйәрлер. Йөне ол ерде кән болмаярлар. Соңра Исаны шол вагткы баш руханы Каяфаның янына гетирйәрлер. Онуң өйүне бирнәче дини ёлбашчылар йыгнанышяр.

Каяфаның өйүнде Исаны суд эдйәрлер. Иса хакда ялан затлары айдян адамлары гетирйәрлер. Дини ёлбашчылар бирагыздан: «Исаны өлдүрмели» диййәрлер. Соңра болса йүзүне түйкүрип, оны юмруклаярлар.

Шол вагт Петрус дашарда ховлуда отырды. Гиҗе совукды, шонуң үчин адамлар от якып отырды. Олар ода йылынып отыркалар, бир хызматкәр гыз Петруса серетди-де: «Бу адам хем Иса биленди» дийди.

Петрус оңа: «Мен оны танамок» дийди.

Оңа Иса билен боландыгыны үч гезек айтдылар. Йөне Петрус үч гезек хем боюн алмады. Петрус үчүнҗи гезек муны айданда, Иса өврүлип, оңа середйәр. Петрус ялан сөзләнине эрбет болуп, дашарык чыкып, мөңңүрип аглаяр.

Бәшинҗи гүни даң билен, руханылар Исаны йыгнак гечирилйән ере, ягны Меҗлисе гетирдилер. Олар бу ерде Исаны нәме этмелидиги барада маслахатлашярлар. Соңра оны Яхуданың хөкүмдары Понтиус Пилатусың янына элтйәрлер.

Руханылар: «Бу эрбет адам. Оны өлдүрмели» диййәрлер. Пилатус Исаны бираз сораг эдип: «Бу адам хич хили эрбет иш этмәндир» дийип, хайран галяр. Соңра Пилатус Исаны Хиродес Антипасың янына иберйәр. Хиродес Җелиләниң хөкүмдары болса-да, шол вагт Иерусалимдеди. Хиродес хем Иса хич хили эрбет иш этмәндир дийип, оны ене-де Пилатусың янына иберйәр.

Пилатус Исаны бошатмак ислейәр. Йөне Исаның душманлары оңа дерек башга бир җенаятчы Бараббасы бошатмагы талап эдйәрлер. Пилатус Исаны ярым гүнләп халкың өңүне чыкарып: «Ине, сизиң патышаңыз, середиң!» диййәр. Руханылар болса: «Бу адамы ёк эт! Оны өлдүр! Өлдүр!» дийип гыгырышярлар. Шонда Пилатус Бараббасы бошадып, Исаны өлдүрдйәр.

Бәшинҗи гүн гүндиз Исаны пүрсе чүйлейәрлер. Онуң хер тарапында өлүм җезасы берлен ики җенаятчы пүрсе чүйленди. Олар суратда гөрненок. Исаның өлүминиң өң янында җенаятчыларың бири: «Иса, патышалыгы аланыңда мени ятла» диййәр. Иса оңа: «Саңа сөз берйәрин, сен Мениң билен Җеннетде боларсың» диййәр.

Бу аҗайып вада дәлми нәме? Исаның хайсы Җеннет барада диенини билйәңми? Худайың башдакы ярадан Җеннети ниреде болдука? Догры, Җеннет ердеди. Иса гөкде патыша боланда, ердәки тәзе Җеннетде багтлы яшамак үчин шол адамы дирелдер. Биз муңа шат дәлми нәме?

Матта 26:57—75; 27:1—50; Лука 22:54—71; 23:1—49; Яхя 18:12—40; 19:1—30.