Hisitolia 101
Ko Te Matehi ʼo Sesu
ʼE KOUTOU sio ki te meʼa fakamataku ʼaenī kua hoko! Kua matehi ia Sesu. Neʼe nātou tutuki ia ia ki he pou, ʼo nātou tutuki te ʼu faʼo ki tona ʼu nima pea mo tona ʼu vaʼe. He koʼe neʼe fai te meʼa ʼaia kia Sesu?
Koteʼuhi neʼe fehiʼa te tahi ʼu hahaʼi kia Sesu. ʼE koutou ʼiloʼi pe ko ai ia nātou ʼaia? Ia nātou ʼaia ʼe kau ai te ʼaselo agakovi ko Satana te Tevolo. Neʼe ko ia ʼaē neʼe ina fakahalaʼi ia Atama pea mo Eva ke nā talagataʼa kia Sehova. Pea ko Satana ʼaē neʼe ina uga te ʼu fili ʼo Sesu ke nātou fakahoko te fakapō fakamataku ʼaia.
ʼI muʼa ʼo te tutuki ʼo Sesu ki te pou, neʼe fai e tona ʼu fili te ʼu meʼa kia ia. Koutou manatuʼi tanatou ʼolo ki te ʼōloto ʼo Setesemane pea mo tanatou puke ia ia? Neʼe ko ai te ʼu fili ʼaia? Neʼe ko te kau takitaki lotu. Tou vakaʼi pe koteā te meʼa ʼaē neʼe hoko ki muli age.
ʼI te temi ʼaē neʼe puke ai ia Sesu e te kau takitaki lotu, neʼe feholaki tana kau ʼapositolo. ʼO nātou tuku tokotahi ia Sesu mo tona ʼu fili, koteʼuhi neʼe kua nātou matataku. Kae neʼe mole hola mamaʼo te ʼu ʼapositolo ko Petelo pea mo Soane. Neʼe nā mulimuli ia nātou ke nā ʼiloʼi te meʼa ʼaē ka hoko kia Sesu.
Neʼe ʼave e te kau pelepitelo ia Sesu ki te ʼapi ʼo te matuʼa ko Ana, ʼaē neʼe ko te pelepitelo lahi ʼāfea. Neʼe mole nonofo fualoa ai te hahaʼi. Pea nātou ʼave ia Sesu ki te ʼapi ʼo Kaifa, ʼaē neʼe pelepitelo lahi ʼi te temi ʼaia. Neʼe tokolahi te kau takitaki lotu neʼe nātou fakatahitahi ʼi tona ʼapi.
ʼI te ʼapi ʼo Kaifa neʼe fai ai tona fakamāuʼi. Neʼe ʼaumai te ʼu hahaʼi ke nātou fai he ʼu fakamoʼoni loi ʼo ʼuhiga mo Sesu. Neʼe ʼui age e te kau takitaki lotu: ‘ ʼE tonu ke matehi ia Sesu.’ Pea neʼe nātou ʼanuʼanuhi ai tona fofoga pea nātou hoka ia ia.
ʼI te lolotoga hoko ʼo te ʼu meʼa ʼaia, neʼe nofo ia Petelo ʼi tuʼa ʼi te malaʼe. Neʼe momoko te po ʼaia, pea neʼe tafu e te hahaʼi te afi. ʼI tanatou fakamāmāfana ʼi te afi, neʼe ʼiloʼi e te fafine ia Petelo, pea ʼui maʼana: ‘Neʼe toe fakatahi mo te tagata ʼaenī pea mo Sesu.’
Neʼe tali age e Petelo: ‘Kailoa!’
Neʼe tuʼa tolu te ʼui age e te hahaʼi kia Petelo neʼe fakatahi ia mo Sesu. Kae neʼe fakafisi tuʼa tolu ia Petelo ki te faʼahi ʼaia. ʼI te tolu fakafisi ʼa Petelo, neʼe haga age ia Sesu ʼo sio ki ai. Neʼe fakahemala ai ia Petelo ʼi tana loi ʼaia, pea neʼe ʼalu ia ki tuʼa ʼo tagi ai.
ʼI te hopo ake ʼo te laʼā ʼi te Feliaono uhu, neʼe ʼave e te ʼu pelepitelo ia Sesu ki te fono lahi, ki te Sanetualio. ʼI te potu ʼaia neʼe nātou vakaʼi ai pe koteā anai te meʼa ʼaē ka nātou fai ki ai. Neʼe nātou ʼave ia ia kia Posio Pilato, te pule ʼo te tisitilike ʼo Sutea.
Neʼe ʼui age e te kau pelepitelo kia Pilato: ‘Ko ia nei ʼe ko he tagata agakovi. ʼE tonu ke matehi.’ ʼI tana ʼosi fakafehuʼi ia Sesu, neʼe ʼui age e Pilato: ‘ ʼE mole ʼau maʼu he hala ʼi te tagata ʼaenī.’ Pea neʼe fekau e Pilato ke ʼave ia Sesu kia Helote Atipasi. Ko Helote ʼe ko te pule ʼo Kalilea, kae ʼe nofo ia ʼi Selusalemi. Neʼe mole maʼu e Helote he kovi ia Sesu, pea neʼe ina toe fekauʼi ia ia kia Pilato.
Neʼe fia tuku age e Pilato ia Sesu. Kae neʼe loto te ʼu fili ʼo Sesu ke tuku age te tahi tagata pilisoni. Neʼe ko te tagata kaihaʼa ko Palapasi. ʼI te temi ʼo te fetapā neʼe ʼaumai e Pilato ia Sesu ki tuʼa. Neʼe ina ʼui age ki te hahaʼi: ‘Koʼeni! Tokotou hau!’ Kae neʼe kalaga fēnei te ʼu pelepitelo pule: ‘Ke puke ia ia! Ke matehi ia ia! Ke matehi ia ia!’ Pea neʼe tuku age e Pilato ia Palapasi, pea nātou puke ia Sesu ke matehi.
ʼI te Feliaono hoʼatā neʼe tutuki ia Sesu ki te pou. ʼE mole hā ʼi te paki, kae ʼi te ʼu tafa ʼo Sesu neʼe tutuki ai te ʼu tagata fai fakapō. ʼI muʼa ʼo te mate ʼa Sesu, neʼe ʼui age e te tahi ʼi te ʼu tagata fai fakapō ʼaia: ‘Manatuʼi ʼau mokā ke hū anai ki tou puleʼaga.’ Pea tali age e Sesu: ‘ ʼE ʼau fakapapau atu ʼe ke nofo anai mo ʼau ʼi te Palatiso.’
ʼE mole ko he fakapapau taulekaleka koa la ʼaia? ʼE koutou ʼiloʼi pe koteā te palatiso ʼaē neʼe talanoa ki ai ia Sesu? Neʼe tuʼu koa ʼifea te palatiso ʼaē neʼe fakatupu e te ʼAtua ʼi te kamata? Neʼe tuʼu ʼi te kele. Pea ʼi te temi ʼaē ka nofo ai leva ia Sesu ko te hau ʼi selo, ʼe ina fakatuʼuake anai te tagata ʼaia ke maʼuli ʼi te Palatiso foʼou ʼaia ʼi te kele. ʼE mole tonu koa la ke tou fiafia ʼi te faʼahi ʼaia?