Tantara 101

Jesosy Nivonen̈a

ZAHAVA Jesosy nivonen̈a! Izy nahanton̈on-drô tamy kakazo araiky mahitsy. Tan̈anany ndreky vitinany nipipen-drô kilò. Nan̈ino ma Jesosy nataon-drô karaha zen̈y?

Izio olo tsy tia Jesosy aby io fo. Hainao azôvy irô io? Araiky amin-drô, anjely ratsy fan̈ahy zay. Satana Devoly, araiky nandrisiky Adama ndreky Eva tsy han̈araka volan̈a Jehovah in̈y. Satana koa nandrisiky fahavalon’i Jesosy hamono izy.

Ndray talohan’i Jesosy nipipen̈a kilò tamy kakazo in̈y, fahavalonany aby io fa tsy tia izy edy. Azonao onon̈o, irô navy hisambotro izy tamy zaridain̈y Getsemane in̈y? Azôvy fahavalonany tamin’izin̈y? Mpitaondra fivavahan̈a aby io. Alô zahavatsika raha nandalo tafaran’izin̈y.

Jesosy koa fa nisambôrin’ny Mpitaondra fivavahan̈a aby in̈y, apostoly aby io nilefa. Irô niala Jesosy, fôtony irô navozo. Apostoly Petera ndreky Jaona tsy nilefa lavitry fa nan̈arakaraka tiô fo, beky mahita raha jiaby mahazo Jesosy.

Mpisôron̈o aby io amy zay nitaondra Jesosy tamy Anasy. Izy taloha mpisôron̈obe fa izy iziô efa matoelahy be. Vahoaka tamy zen̈y tsy nidôko tiô. Jesosy amy zay nindesin-drô tamy tran̈on’i Kaiafa. Kaiafa mpisôron̈obe tamy zen̈y. Naro oe mpitaondra fivavahan̈a nivory tao tamy zen̈y.

Tamy tran̈on’i Kaiafa tao natao fitsaran̈a. Nisy olo nirahan-drô nivolan̈a vandy mikasiky Jesosy. Mpitaondra fivavahan̈a jiaby tao nivolan̈a kara’ty: ‘Tôkony vonen̈a an̈y Jesosy io.’ Irô amy zay nandraora tamy soran’i Jesosy, baka iô namango hipy.

Petera tamin’io tan-dakoro tao fo. Andra tamy zen̈y efa alin̈y sady nanintsy, ke olo namindro tamy môtro beky mafampàna. Irô koa fa nikodidin̈y môtro in̈y, nisy ampiasa man̈angy nizaha Petera mare, sady nivolan̈a: ‘Lelahy io koa dia araiky amy Jesosy.’

Volan̈in’i Petera: ‘Zaho tsy dia araiky aminany!’

Intelo olo aby io nivolan̈a fa Petera dia araiky amy Jesosy, kanefa Petera nifamatra. Tamy fan̈intelony Petera nifamatra, Jesosy nitodiky taminany. Nanen̈iny farany mare Petera navandy. Ke, izy niboaka tambelan̈a lakoro tan̈y, nitomoan̈y.

Joma marandrain̈y, Jesosy nindesin’ny mpisôron̈o aby io tamy Fitsarana Avo. Fitsarana Avo io tany fan̈anaovan-drô Jiosy aby io fivorian̈a matomboko. Tao irô nandiniky raha hataon-drô Jesosy. Izy amy zay nindesin-drô tamy Pontio Pilato, goverinera ta Jodia.

Volan̈in’ny mpisôron̈o aby io tamy Pilato: ‘In̈y olo tsy manjary. Vonen̈a fo man̈eva izy.’ Pilato koa fa boaka nan̈ontany Jesosy raha maro, nivolan̈a kara’ty: ‘Zaho tsendriky nahita raha volan̈iko mikasiky izy.’ Jesosy baka tiô nalefan’i Pilato tamy Heroda Antipasy. Heroda io mpanapaka ta Galilia, fa izy tamy zen̈y ta Jerosalema. Heroda tsy nahita raha ivolan̈ana Jesosy foeky, ke izy nampodiny tamy Pilato tan̈y.

Pilato ti handefa Jesosy, kanefa fahavalon’i Jesosy aby io tsy nety. Nisy gadra hafa, mpangalatra be tian-drô halefa fa tsy Jesosy. Barabasy an̈arany. Andra koa fa midì, Jesosy nindesin’i Pilato tamy vahoaka. Volan̈iny: ‘Zahava ampanjakanarô!’ Fa lohandohany tamy mpisôron̈o nivolan̈a: ‘Adosoa an̈y olo karaha io, zahay tsy mila! Vonia an̈y zalahy! Vonia an̈y!’ Barabasy amy zay navôsotro Pilato fa Jesosy nindesin̈y, hivonen̈a.

Joma folakandra, Jesosy nipipen̈a kilò tamy kakazo. Misy lelahy aroe niaraka nivonen̈a tamy Jesosy, fa tsy hita amy sary iô. Talohan’i Jesosy hofoaty, araiky nivolan̈a kara’ty taminany: ‘Tsaraova zaho, anao koa fa amy fanjakan̈anao an̈y.’ Volan̈in’i Jesosy: ‘Zaho mampan̈anten̈a anao fa anao hiaraka aminakahy amy Paradisa.’

Tsara raha nampan̈antin̈en̈a zen̈y, sa karakôry? Hainao paradisa nikoran̈in’i Jesosy zen̈y? Taia paradisa nataon’ny Zan̈ahary tamy voanalohany? Tambony tany, tsy zen̈y? Lera Jesosy mitaondra an-dan̈itry an̈y, lelahy io hivilômin̈y. Amy lairan’izen̈y, tany ty hanjary Paradisa vaovao. Haravoan̈a ma nintsika amy zen̈y!

Matio 26:57-75; 27:1-50; Lioka 22:54-71; 23:1-49; Jaona 18:12-40; 19:1-30.