ALOLE cindu cakogoya cacikutendekwaco! Yesu akum’wulaga. Am’ŵisile pacitela! Amkomele misomali m’magasa, soni mu sajo syakwe. Ligongo cici akumtendela yeleyi Yesu?

Lili ligongo lyakuti ŵandu ŵane akum’ŵenga Yesu. Ana akwamanyilila ŵanduŵa? Jwine mwa ŵeleŵa ali lilayika lyakusakala Satana. Jwalakwe ni juŵatendekasisye Adamu ni Hawa kuti akampikanila Yehofa. Soni Satana peju ni juŵatendekasisye kuti acimmagongo ŵa Yesu atende cakulemwa cakogoyaci.

Yesu mkanamkomele pacitelapa acimmagongo ŵakwe ŵamtendelesoni yangalwe. Ana akukumbucila muŵayicile acimmagongoŵa ku mgunda wa Getisemeni ni kumjigala? Ana acimmagongoŵa ŵaliji ŵani? Ŵaliji acimlongola ŵa dini. Kwende tulole yayatendece kaneko.

Acimlongola ŵa dini pamkamwile Yesu, ŵandumetume ŵakwe akutila. Ligongo lyakuti wakamwile woga, akumleka Yesu jika ali ni acimmagongo ŵakwe. Nambo ndumetume Petulo ni Yohane nganatilila kwakutalicila. Jemanjaji ŵakuyaga kuti alole yaciyimtendecele Yesu.

Ŵambopesi akumjawusya Yesu kwa mundu jwacikulile Anasi, juŵaliji jwamkulungwa jwa ŵambopesi munyumamu. Likugali nganilicelewa kwa munduju. Kaneko akumjawusya Yesu kwa Kayafa, jwali sambano jwamkulungwa jwa ŵambopesi. Acimlongola ŵa dini ŵajinji asongangene pa nyumba jakweji.

Ku nyumba ja Kayafaku akutanda kumjimba Yesu magambo. Akuyika nawo ŵandu kuti asale yaunami pakwamba ya Yesu. Acimlongola ŵa dini wosope akusala kuti: ‘Yesu akusosekwa kum’wulaga.’ Kaneko akumsunila mata pangope, soni akumputa yibagela.

Yeleyi payikutendekwa, Petulo ali kusa kwa maloga. Cili cilo cakusisima, m’yoyo ŵandu akukolesisye moto. Ŵandu pakota moto, jwamasengo jwacisikana akumlola Petulo, kaneko akuŵeceta kuti: ‘Aju munduju ŵalijisoni ni Yesu.’

Petulo akwanga kuti: ‘Iyayi, nganimba najo!’

Katatu kose ŵandu akuŵeceta kuti Petulo ŵaliji ni Yesu. Nambo ndaŵi syosopesyo Petulo ŵajangaga kuti yaunami. Petulo pakukana katatu, Yesu akugalawuka nikumlola. Petulo akulitendela canasa ligongo lyakusala yaunami, kaneko akutyoka pali ŵandupo nikutanda kulila.

Lyamsano kundaŵi lyuŵa palikutanda kopoka, ŵambopesi akumjawusya Yesu ku Nganya jawo Japenani. Akuno akutagulilana pakwamba yakusaka kumtendela Yesu. Akumjawusyasoni kwa Pontiyo Pilato, jwakulamulila upande wa Yudeya.

Ŵambopesi akumsalila Pilato kuti: ‘Aju ali mundu jwakusakala. Akusosekwa kum’wulaga.’ Panyuma pakum’wusya Yesu mawusyo, Pilato akuŵeceta kuti: ‘Nganguyiwona kuti atesile cinecakwe cakulemweceka.’ Kaneko Pilato akumtumisya Yesu kwa Helode Antipa. Helode ali jwakulamulila Galilaya, nambo akutamila mu Yelusalemu. Helode ngakuyiwonasoni kuti Yesu atesile cinecakwe cakulemweceka, m’yoyo akumtumisyasoni kwa Pilato.

Pilato akusaka amgopole Yesu. Nambo acimmagongo ŵa Yesu akusaka kuti mmalo mwa Yesu amgopole mkayidi jwine. Mkayidi jwineju ŵaliji jwaciswamba Balaba. Sambano ndaŵi jili ca m’ma 12 koloko musi, Pilato pakumkoposya pasa Yesu. Jwalakwe akuŵeceta kwa ŵandu kuti: ‘Alole! Mwenye jwawo!’ Nambo acakulungwa ŵambopesiwo akugumila kuti: ‘Amtyosye! Am’wulaje! Am’wulaje!’ Sambano Pilato akumgopola Balaba, nambo ŵandu ŵala akumjigala Yesu kuti akam’wulaje.

Lyamsano musi Yesu akumkomela pacitela. Ŵandu ŵane ŵaŵili ŵakasa malamusi akwakomelasoni pacitela, jwine mbali jine ja Yesu jwinesoni mbali jineji, nambo paciwulilipa ngaŵa mkwawona. Yesu ali asigele panandi kuwa, mundu jwine jwakasa malamusi jula akuŵeceta kuti: ‘Angumbucile une pacakajinjile mu ucimwene wawo.’ Yesu akumjanga kuti: ‘Ngumsalila kuti mmwejo cimciŵa ni une mu Paladaiso.’

Ana yaŵamsalileyi ngaŵa yambone? Ana akumanyilila kuti Yesu akusala ya paladaiso jwakwe jwapi? Ana paladaiso juŵapanganyisye Mlungu pandanda jwaliji kwapi? Jwaliji pacilambo capasi. Soni Yesu pacacilamulilaga mpela mwenye kwinani, cacimjimusya munduju kuti asangalale ni umi mu Paladaiso jwasambano pacilambo capasi. Ana ngatukusangalala ligongo lya yeleyi?