Bute me 7

Cer pa Yecu Nio wa i Tweyo Paulo i Mabuc

I nino me adek-ke i nge tone, kicero Yecu woko. I nino meno en onyutte bot lulub kore tyen abic mapatpat. Yecu omedde ki nyutte botgi pi nino 40. I ngeye, ma lupwonnyene mogo tye ka neno, en oito malo i polo. Lacen i nge nino apar Lubanga oonyo cwiny maleng i kom lulub kor Yecu ma gitye ka kurone i Jerucalem.

Lacen, lukwor pa Lubanga guweko kitweyo lukwena i mabuc, ento lamalaika mo ogonyogi woko. Lupyem mogo gucelo Lapwonnye Citefano ki gweng guneko woko. Ento wakwano kit ma Yecu oyero kwede ngat acel i kin lupyem magi me doko laticce ma dok pat, ci en odoko lakwena Paulo. Dong, mwaka adek ki nucu i nge to pa Yecu, Lubanga ocwalo lakwena Petero me lok ki Kornelio, ngat ma pe Lajudaya, kacel ki jo me ode.

Cokcok mwaka 13 i ngeye, Paulo ocako wotte me acel me cito ka tito lok me kwena maber. I wotte me aryo Temceo owoto kacel ki Paulo. Wakwano kit ma Paulo gin ki luwote ma en woto kwedgi gunongo yomcwiny tutwal i tic pi Lubanga. I agikki, kitweyo Paulo i mabuc i Roma. Mwaka aryo i ngeye, gigonyo en woko, ento dok kitweye i mabuc odoco ka gineke woko. Jami ma i DUL ME 7 otimme i kare ma romo mwaka 32.