სიკვდილიდან მესამე დღეს ღმერთმა იესო მკვდრეთით აღადგინა. იმავე დღეს ის ხუთჯერ ეჩვენა თავის მიმდევრებს. იესო მათთან 40 დღე დარჩა. ბოლოს ზოგიერთი მოწაფის თვალწინ ის ზეცად ამაღლდა. ათი დღის შემდეგ ღმერთმა წმინდა სული მოჰფინა იესოს მიმდევრებს, რომლებიც იერუსალიმში იყვნენ შეკრებილნი.

მოგვიანებით ღვთის მტრებმა მოციქულები დააპატიმრეს, მაგრამ ანგელოზმა გაათავისუფლა ისინი. მოწინააღმდეგეებმა ქვებით ჩაქოლეს მოწაფე სტეფანე. ამ მოწინააღმდეგეთაგან ერთ-ერთი იესომ განსაკუთრებული მსახურებისთვის აირჩია და ის მოციქული პავლე გახდა. იესოს სიკვდილიდან სამწელიწად-ნახევრის შემდეგ ღმერთმა მოციქული პეტრე გაგზავნა არაიუდეველ კორნელიუსთან, რომ მისი სახლეულობისთვის ექადაგა.

დაახლოებით 13 წლის შემდეგ პავლემ თავისი პირველი სამქადაგებლო მოგზაურობა დაიწყო. მეორე მოგზაურობის დროს მას ტიმოთე შეუერთდა. ჩვენ წავიკითხავთ, რა ამაღელვებელი შემთხვევები გადახდათ მსახურების დროს პავლესა და მის თანამსახურებს. ბოლოს პავლე რომში დააპატიმრეს. ორი წლის შემდეგ ის გაათავისუფლეს, მაგრამ ისევ საპყრობილეში ჩასვეს და მოკლეს. მეშვიდე ნაწილი მოიცავს დაახლოებით 32-წლიან პერიოდს.