Ещанэ махуэм Хьисэ лІахэм къахэтэджыкІыжащ. А махуэ дыдэм ар тхуэ къахуэкІуащ и лъэужь ирикІуэхэм. Апхуэдэу махуэ 40–кІэ къахуэкІуащ. ИтІанэ и гъэсэнхэм щыщу гуп мащІэм ялъагъуу уафэм дэкІуеижащ. МахуипщІ дэкІа нэужь, Алыхьым и дух лъапІэр къахуригъэхащ, апщІондэху Иерусалим дэмыкІыу дэса и гъэсэнхэм.

ИужьыІуэкІэ бийхэм яхузэфІэкІащ апостолхэр тутнакъым ирагъэтІысхьэн, ауэ ахэр мелыІычым къиутІыпщыжащ. Хьисэ и лъэужь итахэм ящыщ Стефан мывэкІэ яукІащ. Дэ къэтщІэнущ бийхэм щыщ зы, апостол ПавелкІэ зэджэ хъунур, Хьисэ къыхихыу и лэжьакІуэ хэха зэрищІынур. Хьисэ зэрылІэрэ илъэсищрэ ныкъуэрэ дэкІауэ Алыхьым апостол Пётр егъакІуэ мыиудей Корнилийрэ абы и унагъуэмрэ хъыбарыфІыр жригъэІэну.

Илъэс 13 дэкІа нэужь, Павел япэу зекІуэ йожьэ, хъыбарыфІыр игъэІуну. ЕтІуанэу зекІуэ щежьэм абы Тимофей гъусэ хуохъу. Дэ къэтщІэнущ Павелрэ абы и гъусахэмрэ здэкІуам къащыщыщІа гузэвэгъуэхэр. ИкІэм–икІэжым Павел Рим дэт тутнакъым ирагъэтІысхьащ. ИлъэситІ дэкІа нэужь, къаутІыпщыжащ, ауэ аргуэру ирагъэтІысхьэжри итІанэ яукІащ. ЕБЛАНЭ Іыхьэм къыщыхъу Іуэхугъуэхэм илъэс 32–рэ къызэщІаубыдэ.