Li Jesus kiwakliik wiʼ chik chi yoʼyo naq oxibʼ kutan xkamik. Saʼ li kutan aʼan, oobʼ sut kixkʼut ribʼ chiruhebʼ li xtzolom. Ut chiru 40 kutan inkʼaʼ kixkanabʼ xkʼutbʼal ribʼ chiruhebʼ. Wiibʼ oxibʼ rehebʼ li xtzolom keʼril naq xko saʼ choxa. Lajeebʼ kutan xikik li Jesus saʼ choxa, naq li Yos kixkʼe li santil musiqʼej saʼ xbʼeenebʼ li keʼkanaak chi oybʼeenink aran Jerusalen.

Chirix chik aʼan, ebʼ li xikʼ keʼilok re li Yos keʼxkʼe saʼ tzʼalam ebʼ li xtzolom li Jesus, abʼan jun li anjel kikolok rehebʼ. Ebʼ li xikʼ keʼilok keʼxkʼe chi pek laj Esteban toj reetal keʼxkamsi. Tqatzol ajwiʼ naq li Jesus kixsikʼ jun rehebʼ li xtzolom re naq tkʼanjelaq chiru ut aʼan li apostol Pablo. Ak oxibʼ chihabʼ rikʼin waqibʼ po xkamik li Jesus, naq li Yos kixtaqla li apostol Pedro saʼ rochoch laj Cornelio re naq tixye re li chaabʼil esilal. Li winq aʼin, moko aj Judio ta.

Naq kinumeʼk 13 chihabʼ laj Pablo xko saʼ jalan chik tenamit chi xpuktesinkil li chaabʼil esilal. Saʼ li xkabʼ sut laj Timoteo xko chirix laj Pablo. Naq laj Pablo ut ebʼ li rochbʼeen keʼkʼanjelak chiru li Yos wank sut keʼxtaw xsahilal xchʼool ut wank sut keʼxkʼul li rahilal. Chirix chik aʼan, laj Pablo kiwank saʼ tzʼalam saʼ li tenamit Roma. Naq kinumeʼk wiibʼ chihabʼ, kiʼelk saʼ tzʼalam. Ut naq kiʼok wiʼ chik saʼ tzʼalam, keʼxkamsi. Chiru 32 chihabʼ tana kikʼulmank li XWUQ Tasal aʼin.