Thikũ ithatũ thutha wa gĩkuũ-rĩ, Jesu nĩariũkirio. Mũthenya oro ũcio akiumĩrĩra arũmĩrĩri ake mahinda matano. Jesu aathire na mbere kũmoimĩrĩra matukũ 40. Rĩu ningĩ, arutwo amwe ake macũthĩrĩirie o ũguo-rĩ, Jesu akĩambata igũrũ. Thikũ ikũmi thutha ũcio-rĩ, Ngai agĩikũrũkĩria arũmĩrĩri a Jesu arĩa metereire kũu Jerusalemu roho wake mũtheru.

Thutha ũcio, thũ cia Ngai igĩikithia atũmwo korokoro-inĩ, no ningĩ mũraika akĩmohora. Mũrutwo ũrĩa wetagwo Stefano akĩhũrũo na mahiga agĩkua nĩ akararia acio. Ĩndĩ twĩrutaga ũrĩa Jesu aathurire ũmwe wa akararia acio atuĩke ndungata yake ya mwanya, na nĩwe watuĩkire mũtũmwo Paulo. Ningĩ, mĩaka ĩtatũ na nuthu thutha wa gĩkuũ kĩa Jesu, Ngai akĩrekia mũtũmwo Petero akahunjĩrie Korinelio ũrĩa ũtaarĩ Mũyahudi hamwe na nyũmba yake.

Ta mĩaka 13 thutha ũcio Paulo akĩambĩrĩria rũgendo rwake rwa mbere rwa kũhunjia. Rũgendo-inĩ rwa kerĩ Timotheo agĩtwarana na Paulo. Twĩrutaga ũrĩa Paulo na aruti wĩra hamwe nake maagĩire na mahinda mega mũno ũtungati-inĩ wao wa Ngai. Mũthia-inĩ, Paulo agĩikio korokoro-inĩ thĩinĩ wa Roma. Mĩaka ĩrĩ thutha ũcio akĩohorũo, no ningĩ agĩikio korokoro-inĩ rĩngĩ na akĩũragwo. Maũndũ ma GĨCUNJĨ kĩa 7 mekĩkire ihinda-inĩ rĩa mĩaka 32.