Jesus okwa li a nyumunwa koufi mefiku etitatu konima yokufya kwaye. Mefiku olo, okwa li e lihololela ovashikuli vaye lwoikando itano. Okwa kala te ve lihololele oule womafiku 40. Nokonima yomafiku oo, ovahongwa vaJesus vamwe ova li ve mu mona eshi ta londo ta i meulu. Konima yomafiku omulongo okudja eshi Jesus a ya meulu, Kalunga okwa li a tilila ovashikuli vaJesus omhepo iyapuki ovo va li va teelela muJerusalem.

Konima yefimbo, ovatondi vaKalunga ova li va idililifa ovayapostoli modolongo, ndele omweengeli wonhumba okwa li e va mangulula mo. Omuhongwa Stefanus okwa li a dipawa nomamanya kovapataneki. Ohatu ke lihonga shi na sha nanghee Jesus a li a hoolola umwe womovapataneki ovo, ndele ta ningi omupiya waye e likalekelwa. Omulumenhu oo okwa ka ninga omuyapostoli Paulus. Konima yomido nhatu netata okudja eshi Jesus a fya, Kalunga okwa li a tuma omuyapostoli Petrus a ka udifile Kornelius noukwaneumbo waye. Kornelius ka li Omujuda.

Eshi pa pita omido 13 lwaapo, Paulus okwa li a hovela olweendo laye lotete loutumwa. Pefimbo lolweendo laye olutivali, ova li va ya pamwe naTimoteus. Ohatu ke lihonga nghee Paulus novaendi pamwe naye va li va hafela oimoniwa itunhula moshilonga shavo shokulongela Kalunga. Lwanima, Paulus okwa li a idililwa modolongo muRoma. Okwa ka mangululwa modolongo konima yomido mbali. Hauxuuninwa, okwa ka tulwa vali modolongo nokudipawa. Oiningwanima aishe oyo ya hokololwa moshitukulwa eshi oshi-7 oya ningwa moule womido di dule 32 lwaapo.