ಯೇಸು ತನ್ನ ಮರಣದ ನಂತರ ಮೂರನೆಯ ದಿನದಲ್ಲಿ ಪುನರುತ್ಥಾನಗೊಳಿಸಲ್ಪಟ್ಟನು. ಆ ದಿನದಲ್ಲಿ ಅವನು ತನ್ನ ಹಿಂಬಾಲಕರಿಗೆ ಐದು ಬೇರೆ ಬೇರೆ ಸಂದರ್ಭಗಳಲ್ಲಿ ಕಾಣಿಸಿಕೊಂಡನು. 40 ದಿನಗಳ ತನಕ ಅವನು ಅವರಿಗೆ ಪದೇ ಪದೇ ಕಾಣಿಸಿಕೊಂಡನು. ಅನಂತರ, ತನ್ನ ಕೆಲವು ಶಿಷ್ಯರು ನೋಡುತ್ತಿದ್ದಂತೆಯೇ ಯೇಸು ಪರಲೋಕಕ್ಕೆ ಏರಿಹೋದನು. ಹತ್ತು ದಿನಗಳ ತರುವಾಯ ಯೆರೂಸಲೇಮಿನಲ್ಲಿದ್ದ ಯೇಸುವಿನ ಹಿಂಬಾಲಕರ ಮೇಲೆ ದೇವರು ಪವಿತ್ರಾತ್ಮವನ್ನು ಸುರಿಸಿದನು.

ತದನಂತರ, ದೇವರ ಶತ್ರುಗಳು ಅಪೊಸ್ತಲರನ್ನು ಸೆರೆಮನೆಯೊಳಗೆ ಹಾಕಿಸಿದರು. ಆದರೆ ಒಬ್ಬ ದೇವದೂತನು ಅವರನ್ನು ಬಿಡಿಸಿದನು. ಶಿಷ್ಯ ಸ್ತೆಫನನು ವಿರೋಧಿಗಳಿಂದ ಕಲ್ಲೆಸೆಯಲ್ಪಟ್ಟು ಕೊಲ್ಲಲ್ಪಟ್ಟನು. ಆದರೆ ಆ ವಿರೋಧಿಗಳಲ್ಲಿ ಒಬ್ಬನನ್ನು ಯೇಸು ಹೇಗೆ ತನ್ನ ವಿಶೇಷ ಸೇವಕನಾಗಿ ಆರಿಸಿಕೊಂಡನೆಂದು ನಾವು ಕಲಿಯುತ್ತೇವೆ. ಅಪೊಸ್ತಲ ಪೌಲನೆಂದು ಪ್ರಸಿದ್ಧನಾದವನೇ ಅವನು. ಯೇಸುವಿನ ಮರಣದ ಮೂರುವರೆ ವರ್ಷಗಳ ನಂತರ ಯೆಹೂದ್ಯನಲ್ಲದ ಕೊರ್ನೇಲ್ಯನಿಗೂ ಅವನ ಮನೆಯವರಿಗೂ ಸುವಾರ್ತೆಯನ್ನು ಸಾರುವಂತೆ ದೇವರು ಅಪೊಸ್ತಲ ಪೇತ್ರನನ್ನು ಕಳುಹಿಸಿದನು.

ಸುಮಾರು 13 ವರ್ಷಗಳಾದ ಮೇಲೆ ಪೌಲನು ತನ್ನ ಮೊದಲನೆಯ ಸಾರುವ ಸಂಚಾರವನ್ನು ಪ್ರಾರಂಭಿಸಿದನು. ಅವನ ಎರಡನೆಯ ಸಂಚಾರದಲ್ಲಿ ತಿಮೊಥೆಯನು ಪೌಲನನ್ನು ಜೊತೆಗೂಡಿದನು. ದೇವರ ಸೇವೆಯಲ್ಲಿ ಪೌಲನಿಗೆ ಮತ್ತು ಅವನ ಸಂಚಾರ ಸಂಗಡಿಗರಿಗಾದ ಅನೇಕ ರೋಮಾಂಚಕ ಸಮಯಗಳ ಕುರಿತು ನಾವು ಕಲಿಯುತ್ತೇವೆ. ಕೊನೆಗೆ, ಪೌಲನು ರೋಮಿನಲ್ಲಿ ಸೆರೆಮನೆಗೆ ಹಾಕಲ್ಪಟ್ಟನು. ಎರಡು ವರ್ಷಗಳ ಬಳಿಕ ಅವನು ಬಿಡಿಸಲ್ಪಟ್ಟನು. ಆದರೆ ಅವನು ಪುನಃ ಸೆರೆಗೆ ಹಾಕಲ್ಪಟ್ಟು ಕೊಲ್ಲಲ್ಪಟ್ಟನು. ಭಾಗ ಏಳರ ಘಟನೆಗಳು ಸುಮಾರು 32 ವರ್ಷಗಳ ಕಾಲಾವಧಿಯಲ್ಲಿ ನಡೆದವು.