Tej otaqxi tzikʼ oxe qʼij tkyimlen Jesús, jaw anqʼin juntl maj. Toj qʼij aju, kubʼ tyekʼin tibʼ Jesús jweʼ maj kywitz qe t-xnaqʼtzbʼen. Kukx kubʼ tyekʼe tibʼ kywitz tuj 40 qʼij. Kywitztzun junjun t-xnaqʼtzbʼen jax toj kyaʼj. Tikʼtl lajaj qʼij tzaj tqʼoʼn Dios xewbʼaj xjan kye qejo lepcheqeʼktaq tiʼj Jesús aqeju in che ayonteq tuj Jerusalén.

Yajxitl, e okx qʼoʼn qe apóstol pres kyuʼn qe aj qʼoj tiʼj Dios, naqtzen tuʼnj e tzaqpaj tuʼn jun anjel. Aju t-xnaqʼtzbʼen Jesús Esteban kubʼ bʼiyoʼn kyuʼn ajqʼoj tukʼe abʼj. Ax ikx kʼelel qnikʼ qa jaw tskʼoʼn Jesús jun tbʼanel tmajen kyxol qeju ajqʼoj, aju ok te apóstol Pablo. Tej otaq tzikʼ oxe abʼqʼi tukʼe nikʼjan tkyimlen Jesús, xi tsamaʼn Dios apóstol Pedro tuʼn t-xi yolil tiʼj Tyol tukʼe Cornelio, aju nya judiyteq, kyukʼix tuj tja.

Tej tikʼtl 13 abʼqʼi xi tzyet tnejel maj tqan Pablo tuʼn t-xiʼ Pakbʼal. Tej t-xiʼ Pablo tuj tkabʼ maj tqan, xi tiʼn Timoteo tukʼe. Tej najbʼentoq Pablo kyukʼex tukʼil te Dios, ikʼ nim tiʼchaq tbʼanel toj kybʼe. Yajxitl, okx qʼoʼn Pablo pres toj Roma. Tej tikʼ kabʼe abʼqʼi etz tzaqpiʼn, okx juntl maj pres ex kubʼ bʼiyoʼn. Aju TWUQIN Kʼloj txʼolbʼabʼil lu, in xi tiʼn chʼixmele 32 abʼqʼi.