येशूच्या मृत्यूनंतर तिसऱ्‍या दिवशी, त्याला उठवलं गेलं. त्या दिवशी वेगवेगळ्या पाच वेळा, त्यानं आपल्या अनुयायांना दर्शन दिलं. ४० दिवस येशू त्यांना दर्शन देत राहिला; आणि मग, त्याच्या काही शिष्यांच्या देखत, स्वर्गाला गेला. त्यानंतर दहा दिवसांनी, जेरूसलेममध्ये वाट पाहात असलेल्या येशूच्या अनुयायांवर देवानं पवित्र आत्मा ओतला.

पुढे, देवाच्या शत्रूंनी प्रेषितांना तुरुंगात टाकवलं, पण एका देवदूतानं त्यांना मोकळं केलं. विरोधकांनी दगडमार करून स्तेफन नावाच्या अनुयायाचा वध केला. परंतु, आपला खास सेवक होण्यासाठी, या विरोधकांपैकी एकाला येशूनं कसं निवडलं, हे आपल्याला कळतं. तोच प्रेषित पौल झाला. मग येशूच्या मृत्यू नंतर साडेतीन वर्षांनी, यहूदेत्तर कर्नेल्य आणि त्याच्या परिवाराला उपदेश करण्यासाठी देवानं प्रेषित पेत्राला पाठवलं.

त्यानंतर सुमारे १३ वर्षांनी, पौलानं आपल्या पहिल्या प्रचार यात्रेची सुरुवात केली. दुसऱ्‍या यात्रेच्या वेळी तीमथ्य पौलाला येऊन मिळाला. देवाच्या सेवेत, पौल आणि त्याच्या सहयात्रींवर आलेल्या अनेक रोमांचकारी प्रसंगांबद्दल, आपण शिकतो. शेवटी, पौलाला रोममध्ये तुरुंगात टाकलं गेलं. दोन वर्षांनी तो सुटला; पण पुन्हा कैद झाला व मारला गेला. भाग ७ मधल्या घटना जवळपास ३२ वर्षांच्या काळात घडल्या.