Yesu ua sangukile, ha litangua lia mu citatu fume ha ku-tsa ceni. Mu litangua lize ua lisoluele lutanu ku vandongesi veni. Ua tualeleho ku lisolola kuli vakevo mu matangua 40. Kaha Yesu ua londele muilu, oku vandongesi veni va na mu tala. Mu nima ya matangua likumi Njambi ua muaniene sipilitu santu hali vakua ku kava Yesu va kele na ku lavelela mu Yelusalema.

Kaha ku lutue lua ntsimbu, vitozi va Njambi va hakele vapostolo mu kamenga, vunoni kangelo ua va patuilemo. Ndongesi ua lizina Setefanu, va mu asele mavue kuli vitozi, noho ua tsile. Vunoni, tu ka lilongesa vati Yesu ua hanguile umo ua vaze vitozi ku mu puisa ngamba yeni ua ku lifuila, u va sanene honi nguavo kapostolo Paulu. Kaha mu nima ya miaka itatu na vingonde 6 fume ha kutsa ca Yesu, Njambi ua tumine kapostolo Petulu ku ka ambuluila umo kati kaYundeya ua lizina Koloneliu na vakua ndzivo yeni.

Mu nima ya miaka 13, Paulu ua putukile vungendzi vueni vua katete vua ku ambulula. Kaha Timoteo ua lipandakanene kuli Paulu mu vungendzi vueni vua mu civali. Tu ka lilongesa vati Paulu na vakuavo vendele neni, va hitile mu vi ntsimbu via vingi via ndzolela omo lia ku pangela Njambi. Mu ku sulumuina, Paulu va mu sokele mu kamenga ku Loma. Mu nima ya miaka ivali va mu patuilemo, vunoni va mu sokele naua mu kamenga kaha va mu tsihile. Mizimbu ya mu MUTAMBA 7 ya ambatele miaka 32.