Jesu o ile a tsošwa bahung letšatšing la boraro ka morago ga ge a hwile. Letšatšing lona leo a iponagatša go balatedi ba gagwe ka makga a mahlano a sa swanego. O ile a tšwela pele a iponagatša go bona ka matšatši a 40. Ke moka nakong e nngwe ge ba bangwe ba barutiwa ba gagwe ba be ba sa mo lebeletše, a rotogela legodimong. Ka morago ga matšatši a lesome a rotogetše legodimong, Modimo a tšhollela moya o mokgethwa godimo ga balatedi ba Jesu bao ba bego ba letile Jerusalema.

Ka morago ga moo, manaba a Modimo a ile a dira gore baapostola ba lahlelwe kgolegong, eupša morongwa a ba lokolla. Morutiwa Stefano o ile a bolawa ke baganetši ka go mo kgatla ka maswika. Eupša re tlo ithuta kamoo Jesu a ilego a kgetha yo mongwe wa baganetši bao gore e be mohlanka wa gagwe yo a kgethegilego yoo a ilego a ba moapostola Paulo. Ke moka nywaga e meraro le seripa ka morago ga lehu la Jesu, Modimo o ile a roma moapostola Petro gore a yo botša Koronelio yo e bego e se Mojuda gotee le ba lapa la gagwe ditaba tše dibotse.

Ka morago ga mo e ka bago nywaga e 13, Paulo o ile a thoma leeto la gagwe la pele la go bolela ditaba tše dibotse. Leetong la gagwe la bobedi, Timotheo o ile a sepela le yena. Re tlo ithuta kamoo Paulo le batho bao a bego a sepela le bona ba bilego le dinako tše dintši tše di thabišago ge ba dutše ba hlankela Modimo. Mafelelong, Paulo o ile a golegwa kua Roma. Ka morago ga nywaga e mebedi a lokollwa, eupša a tla a golegwa gape ke moka a bolawa. Ditiragalo tše di lego mo go KAROLO 7 di akaretša nywaga e ka bago e 32.