GAWO 7
Kuyambira Kumuka kwa Jezu Mpaka Kumangidwa kwa Paulo
Jezu adalamusidwa pa nsiku yacitatu ya kufa kwace. Nsiku imweyoletu, iye adawonekera kwa wateweri wace kaxanu-kense, m’nthawe zakusiyana-siyana. Jezu adapitiriza kumbawonekera mu nsiku 40. Patsogolo pace, Jezu adakwira kudzulu pomwe anyakupfunza wace winango wakhamunyang’anisa. Nsiku khumi patsogolo pace, Mulungu adakhuthulira mzimu wakucena kwa wateweri wa Jezu womwe wakhadikhirira ku Jeruzalemu.
Patsogolo pace, anyamadulanthaka wa Mulungu wadaikha m’kawoko wapostolo, tsono anjo adadzawacosa. Nyakupfunza Sitefano, adabomedwa na minyala na anyakuzunza wawo mpaka kufa. Tsono tin’dzapfunza momwe Jezu adasankhulira m’bodzi wa anyakuzunzawo kuti akhale mtumiki wakupambulika, acidzakhala mpostolo Paulo. Ndipo, patapita magole matatu na pakati, ya kufa kwa Jezu, Mulungu adatumiza mpostolo Pedru kukapalizira Korneliyo, omwe akhali lini Mjuda, pabodzi na wa m’nyumba mwace.
Magole 13 patsogolo pace, Paulo adacita ulendo bwace bwakuyamba bwa upalizi. Mu ulendo bwace bwaciwiri, Paulo akhali pabodzi na Timotio. Tin’dzapfunza momwe Paulo na wanzace wa ulendobo wadacitikiridwa bzinthu bzizinji mu utumiki wawo kwa Mulungu. Pakumalizira, Paulo adadzaikhidwa m’kawoko ku Roma. Magole mawiri patsogolo pace, iye adadzatsudzulidwa. Tsono adadzamangidwa pomwe, aciphedwa. Nkhani za mu Gawo LACINOMWELI zidatenga magole 32.
MU GAWOLI
NKHANI 102
Jezu Ana Moyo
Pomwe anjo adacosa mwala omwe akhadafungira thenje lomwe Jezu akhaidwa, alindiri wa m’thenjemo adadabwa kwene-wene na bzomwe adawona mkatimo.
NKHANI 103
Mu Cipinda Cakufungidwa
Kodi n’thangwe ranyi anyakupfunza wa Jezu alibe kumuzindikira pomwe iye adalamusidwa?
NKHANI 104
Jezu Akubwerera Kudzulu
Jezu ankupereka lamulo lakumalizira kwa anyakupfunza wace anati kuyenda kudzulu.
NKHANI 105
Wankudikhirira Ku Jeruzalemu
Kodi n’thangwe ranyi Jezu adathululira mzimu wakucena anyakupfunza wace?
NKHANI 106
Wankucosedwa M’kawoko
Atsogoleri wa bzipembedzo wa Cijuda adakaikha ateweri wa Jezu mkawoko kuti awaletse kucita basa lakupalizira, tsono ndibzo lini bzomwe Mulungu akhafuna.
NKHANI 108
Pa Mseu Wakuyenda Ku Damasko
Ceza comwe pabodzi na mafala yomwe yadabveka kucokera kudzulu bzidacitisa kuti Saulo acinje moyo wace.
NKHANI 109
Pedru Akuzungira Korneliyo
Kodi Mulungu ambawona wanthu wa mtundu munango kukhala wakufunika kuposa winango?
NKHANI 110
Timotio—mthandizi Mupsa Wa Paulo
Timotio ankucoka kwawo ndipo ankuyenda kukapalizira pabodzi na Paulo.
NKHANI 111
Mulumbwana Omwe Adagona
Eutiko adayamba kuwodzira pomwe Paulo akhafotokoza nkhani yace yakuyamba, sikuti yaciwiri. Tsono bzomwe bzidadzacitika patsogolo pace bzikhali bzakudabwisa.
NKHANI 112
Ngalawa Idasweka Pa Ntsuwa
Pomwe bzikhawoneka ninga kuti palibe omwe an’pulumuka, Paulo adauzidwa mafala na Mulungu yomwe yadamupasa cikhulupiro cakuti angadafa lini.
NKHANI 113
Paulo Ku Roma
Kodi Paulo akhakwanisa tani kucita basa lace ninga mpostolo pomwe akhali mkawoko?
