Mi thogi hñupa de nuꞌmu̱ xki du rä Hesu, Äjuä bi gu̱tsꞌi de rä du. Näꞌä paꞌä rä Hesu bi ñꞌudi ku̱tꞌa mꞌiki ko nuꞌu̱ yä de̱ni. ꞌNe bi sigi bi ñꞌudi po 40 yä pa. ꞌNepu̱, rꞌa de nuꞌu̱ yä de̱ni bi hyandi nuꞌmu̱ rä Hesu bi bo̱tsꞌe pa mähetsꞌi. Mi thogi rꞌe̱tꞌa yä pa, Äjuä bä pe̱mpäbi rä mäkä tsꞌe̱di nuꞌu̱ yä de̱ni rä Hesu xki do̱ꞌmi ha Jerusalen.

Mꞌe̱fa, yä nkontra Äjuä bi yꞌe̱ntꞌi ha fadi yä apostol, pe nꞌa rä e̱nxe̱ Äjuä bi gu̱ki de rä fadi. Esteban, nꞌa rä de̱ni rä Hesu bi tho ko yä nkꞌahni. Pe rä Hesu bi huahni nꞌa de nuꞌu̱ yä nkontra pa bi yꞌo̱tꞌe rä apostol, ꞌne geꞌä bi fädi ngu rä apostol Pablo. ꞌNepu̱, mi thogi hñu nje̱ya mäde de xki du rä Hesu, Äjuä bi me̱hni rä apostol Pedro pa bi ꞌñuti de rä Noya Äjuä Kornelio ꞌne nuꞌu̱ mi ꞌmu̱i ha rä nguu, mäske nuyu̱ hingä mi yä judio.

Mi thogi ngu 13 yä je̱ya, Pablo bi ja näꞌä rä mu̱di biahe pa bi ungä ntꞌo̱de rä Noya Äjuä. Ha näꞌä rä yoho rä biahe, Pablo bi zitsꞌi Timoteo. Pablo ꞌne nuꞌu̱ mi ñꞌoui ha yä biahe, bi hyandi ndunthi yä hogä thogi mientra mi pe̱päbi Äjuä. Mꞌe̱fa, Pablo bi tꞌe̱ntꞌi fadi ha Romä po yo nje̱ya. Mäske bi bo̱ni, Pablo bi tꞌe̱ntꞌi mänꞌaki ha rä fadi de Romä ꞌnepu̱ bi tho. Gatꞌho nuꞌu̱ yä thogi mää ha nunä RÄ NTHEKE 7, bi zitsꞌi 32 yä je̱ya.