Wañusqanmanta kimsa punchaw qepatam Jesusqa kawsarimurqa. Chay punchawmi qatiqninkunaman pichqa kutita rikuriykurqa. Hinaspa 40 punchawkama paykunaman rikuriykurqa. Chaymi wakinnin discipulonkuna qawachkaptinku hanaq pachaman hoqarikururqa. Chaymanta chunka punchaw qepataqa Diosmi chuya espiritunta chaqchuykamurqa Jerusalenpi suyaq Jesuspa qatiqninkunaman.

Chaymantam Diospa enemigonkunaqa apostolkunata carcelpi wichqarurqaku, ichaqa huk angelmi paykunata kacharirqa. Estebanpas wañurqa enemigonkuna rumiwan choqaparuptinku. Ichaqa yachasunmi hukninta discipulonña kananpaq Jesusqa akllarusqanta, payqa apostol Pablom karqa. Chaymanta Jesuspa wañusqanmanta kimsa wata parten qepata, Diosqa apostol Pedrota kamachirqa Corneliota chaynataq wasinpi kaqkunata predicananpaq, judiokunapa castamanta mana kaptinpas.

Chaymanta 13 wata qepata Pabloqa predicastin illayta qallarirqa. Iskay kaq kuti illasqanpiñataq Timoteo riysirqa. Pablopas chaynataq illaqmasinkunapas Diosta servispankuqa anchata kusikurqaku. Chaymantapas, Pabloqa Roma llaqtapi presochasqa karqa. Hinaspa iskay watamanta kacharirurqaku, ichaqa yapamanta presocharurqaku chaymantañataq wañurachirqaku. Kay QANCHIS kaq Partepiqa 32 watakunapi pasasqanmanta willachkan.