Lango ota na peko ti so Jésus akui, a zingo lo na kuâ. Na yâ ti oko lango ni so, lo fa tere ti lo na adisciple ti lo fani oku. Lo ngbâ ti sara tongaso teti lango 40. Na pekoni, na ngoi so ambeni ti adisciple ti lo angbâ ti bâ lo, Jésus ague na yayu. Na peko ti lango 10, Nzapa atokua yingo vulu ti lo na ndo ti adisciple ti Jésus so ayeke ku lani na Jérusalem.

Na pekoni, awato ti Nzapa abi abazengele ti Jésus na da ti kanga, me mbeni ange azi ala. Ambeni wato abo disciple Etienne na tênë juska na kuâ. E yeke bâ ande tongana nyen Jésus asoro mbeni oko ti awato so ti ga mbeni kota wakua ti lo, na lo ga bazengele Paul. Ngu ota na ndambo na peko ti kuâ ti Jésus, Nzapa atokua bazengele Pierre ti fa tënë na Corneille, mbeni koli so ayeke Juif pëpe, nga na azo ti da ti lo.

Ngu 13 tongaso na pekoni, Paul ato nda ti sara kozo tambela ti lo ti fa tënë. Na use tambela ti lo ni, Timothée amû peko ti lo. E yeke bâ ande aye ti nzoni mingi so Paul na amba ti lo so atambela legeoko na lo awara na yâ ti kusala ti Nzapa. Na nda ni, a bi Paul na da ti kanga na kodoro ti Rome. Ngu use na pekoni, a zi lo, me a kiri a bi lo na kanga na a fâ lo. Aye so a sara tënë ni na MBAGE 7 so asi na yâ ti angu 32 tongaso.