යේසුස් මැරිලා දවස් තුනක් පහු වුණාම දෙවි ඔහුව නැවත නැඟිට්ටෙව්වා. එදා ඔහු ඔහුගේ ගෝලයන්ට පස් වතාවක්ම පෙනුණා. ඊට පස්සේ තව දවස් 40ක් යනකම් ඒගොල්ලන්ට ඔහුව දැකගන්න පුළුවන් වුණා. හතළිස්වන දවසේදී ගෝලයන්ගෙන් කීපදෙනෙක් බලාගෙන ඉන්දැද්දිම යේසුස් ස්වර්ගයට නැග්ගා. ඊට දවස් දහයකට පස්සේ යෙරුසලමේ හිටිය යේසුස්ගේ ගෝලයන් මතට ශුද්ධාත්මය ආවා.

ඊට පස්සේ දෙවිගේ හතුරන් ප්‍රේරිතයන්ව හිරේ දැම්මා. හැබැයි, දේවදූතයෙක් ඇවිත් ඒගොල්ලන්ව හිරගෙයින් නිදහස් කළා. ස්තේපන් කියලා හිටිය ගෝලයෙක්ට හතුරන් ගල් ගහලා මරලා දැම්මා. ඒ වුණාට මේ හතුරන්ගෙන් එක්කෙනෙක්ව යේසුස්ගේ විශේෂ සේවකයෙක් වෙන්න ඔහු තෝරාගත්ත හැටිත්, එයා පාවුල් කියන ප්‍රේරිතයා වුණ හැටිත් අපි ඉගෙනගන්නවා. යේසුස්ගේ මරණයෙන් අවුරුදු තුනහමාරකට පස්සේ දෙවි ප්‍රේරිත පේතෘස්ව යැව්වා යුදෙව් ජාතියට අයිති නැති කොර්නේලියස්ටයි එයාගේ ගෙදර අයටයි දේශනා කරන්න.

ඊට අවුරුදු 13කට විතර පස්සේ පාවුල් එයාගේ පළවෙනි දේශනා ගමන පටන්ගත්තා. පාවුල්ගේ දෙවෙනි ගමනේදී තිමෝතිත් පාවුල් එක්ක ගියා. අපි ඉගෙනගන්න යනවා පාවුල් හා එයාත් එක්ක ගමන් කළ අය දෙවිට සේවය කරනකොට අද්දැක්ක පුදුම දේවල් ගැන. අන්තිමේදී මිනිස්සු පාවුල්ව රෝමයේ හිරේ දානවා. අවුරුදු දෙකකට පස්සේ එයාව හිරෙන් නිදහස් කළත් එයාව ආයෙත් හිරේ දාලා මේ සැරේ එයාව මරනවා. හත්වෙනි කොටසේ අවුරුදු 32ක විතර කාලයක් පුරා සිද්ධ වුණ දේවල් ගැන කතා කරනවා.