Gado ben opo Yesus na dede na a di fu dri dei, baka di a ben dede. Na a dei dati Yesus ben sori ensrefi feifi tron na en bakaman. Na ini wan pisi ten fu 40 dei, Yesus tan sori ensrefi na den. Ne Yesus ben opo go na hemel, aladi wan tu fu en disipel ben e luku. Tin dei baka dati Gado ben kanti santa yeye kon na tapu Yesus bakaman di ben e wakti na Yerusalem.

Bakaten, dan feanti fu Gado ben meki den poti den apostel na dungru-oso, ma wan engel ben fri den. Gensman ben ston a disipel Stefanus kiri. Ma wi e leri fa Yesus ben teki wan fu den gensman disi leki en spesrutu futuboi èn a ben tron na apostel Paulus. Dri nanga afu yari baka di Yesus ben dede, dan Gado ben seni na apostel Petrus go preiki gi a heiden man Kornelius nanga en osofamiri.

Paulus ben bigin sowan 13 yari na baka nanga en fosi preikiwaka. Timoteyus ben go nanga Paulus na a di fu tu preikiwaka fu Paulus. Wi e leri fa Paulus nanga en kompe di ben go nanga en ben abi furu span momenti na ini a dini fu Gado. Te fu kaba, den e poti Paulus na dungru-oso na Rome. Tu yari na baka den ben lusu en, ma dan den ben poti en baka na dungru-oso èn ben kiri en. Den tori di de na ini Pisi 7 ben feni presi na ini wan pisi ten fu sowan 32 yari.