Loron terseiru depois mate, Jesus moris filafali. Loron neʼe, nia mosu ba ninia dixípulu sira dala lima. Jesus kontinua hatudu ninia an ba sira iha loron 40 nia laran. Tuirmai, dixípulu balu haree Jesus kuandu saʼe ba lalehan. Liutiha loron sanulu, Maromak fakar espíritu santu ba Jesus nia dixípulu sira neʼebé hein iha Jeruzalein.

Tempu balu liu tiha, Maromak nia inimigu sira hatama apóstolu sira iha komarka, maibé anju ida halo sira sai livre. Dixípulu ida naran Estevão mate tanba inimigu sira tuda nia. Maibé, ita sei aprende katak Jesus hili inimigu sira-neʼe ida atu sai ninia atan neʼebé espesiál, no nia sai apóstolu naran Paulo. Tinan tolu ho balun depois Jesus mate, Maromak haruka apóstolu Pedro atu haklaken ba ema neʼebé laʼós judeu naran Cornélio, no sira neʼebé iha ninia uma.

Maizumenus liutiha tinan 13, Paulo komesa ninia viajen primeiru atu haklaken. Iha ninia viajen segundu, Timóteo tuir Paulo. Ita sei aprende oinsá mak Paulo no ninia maluk sira serbí Maromak iha momentu neʼebé haksolok no susar. Ikusmai, ema kaer Paulo. Tinan rua liu tiha, nia sai livre fali, maibé ikusliu, ema halo nia sai fali dadur no oho nia. Istória iha PARTE 7 neʼe, akontese durante maizumenus tinan 32.