Na‘e toetu‘u ‘a Sīsū ‘i he ‘aho hono tolu hili ‘ene maté. ‘I he ‘aho ko iá na‘á ne hā tu‘o nima ki hono kau muimuí ‘i he ngaahi taimi kehekehe. Na‘e hokohoko atu ‘a e hā ‘a Sīsū kiate kinautolú ‘o fe‘unga mo e ‘aho ‘e 40. Pea ‘i he lolotonga ‘a e mamata ‘a e ni‘ihi ‘o ‘ene kau ākongá, na‘e foki hake ‘a Sīsū ki hēvani. ‘I he ‘aho ‘e hongofulu mei ai na‘e hua‘i hifo ‘e he ‘Otuá ‘a e laumālie mā‘oni‘oní ki he kau muimui ‘o Sīsū na‘a nau tatali ‘i Selusalema.

Ki mui mai, na‘e hanga ‘e he ngaahi fili ‘o e ‘Otuá ‘o tuku pilīsone ‘a e kau ‘apositoló, ka na‘e tuku ange kinautolu ‘e ha ‘āngelo. Na‘e tolomaka‘i ‘o mate ‘a e ākonga ko Sitīveni ‘e he kau fakafepakí. Ka te tau ako ki he anga hono fili ‘e Sīsū ‘a e tokotaha ‘o e kau fakafepaki ko ‘ení ke hoko ko ‘ene sevāniti makehe, pea na‘e hoko ia ko e ‘apositolo ko Paula. Pea ‘i he ‘osi ‘a e ta‘u ‘e tolu mo e konga mei he mate ‘a Sīsuú, na‘e fekau ‘e he ‘Otuá ‘a e ‘apositolo ko Pitá ke malanga ki he tokotaha na‘e ‘ikai ko ha Siu ‘a ia ko Koliniusi pea mo hono falé.

‘I he ‘osi nai ‘a e ta‘u ‘e 13 ki mui mai ai na‘e kamata ai ‘e Paula ‘a ‘ene ‘uluaki fononga fakamisinalé. ‘I he‘ene fononga hono uá na‘e ‘alu ai ‘a Tīmote mo Paula. Te tau ako ki he ma‘u ‘e Paula mo hono kaungāfonongá ha ngaahi taimi fakafiefia ‘i he ngāue ki he ‘Otuá. Faifai atu pē pea na‘e tuku pilīsone ‘a Paula ‘i Loma. Na‘e fakatau‘atāina‘i ia ‘i he ‘osi ‘a e ta‘u ‘e ua mei ai, ka na‘e toe tuku pilīsone ia pea na‘e tāmate‘i ai. Ko e ngaahi me‘a ‘oku fakamatala‘i ‘i he KONGA 7 na‘e hoko ‘i he vaha‘a taimi ko e ta‘u nai ‘e 32.