Te Jesús la yichʼ chaʼkuxajtesel te kʼalal kʼaxemix oxeb kʼajkʼal slajel-ae. Ta kʼajkʼal-abi joʼeb buelta la yakʼ sba ta ilel ta stojol te jnopojeletik yuʼune, soknix la yakʼxan sba ta ilel ta 40 kʼajkʼal. Ay chaʼoxtul jnopojeletik te la yilik te bitʼil mo bael ta chʼulchan te Jesuse. Lajuneb kʼajkʼal ta patil, te Dios la yakʼbey chʼul espíritu te jnopojeletik yuʼun te Jesús te yakalik ta smaliyel ta Jerusalene.

Te kʼalal kʼax te kʼajkʼale akʼotik ta chukel yuʼun skontratak Dios te jpuk kʼopetike, jaʼukmeto la yichʼik koltayel yuʼun jtul chʼul abat. Te jnopojel Esteban la yichʼ chʼojel ta ton yuʼun te jkontrainwanejetike. Sok yame jnoptik bael te bin utʼil ay jtul jkontrainwanej te la yichʼ tsael yuʼun Jesús ta swenta jun aʼtelil te bayal skʼoplale, jaʼ ini jaʼ te jpuk kʼop Pabloe. Te kʼalal kʼaxix oxeb jaʼbil sok olil slajel-a te Jesuse, te Pedro la yichʼ tikunel bael yuʼun Dios ta xcholbeyel skʼop Dios yaʼiy te Cornelio te ma judío winikuk sok te jayeb machʼatik ay yuʼun ta snae.

Ayniwanix yoxlajunebal jaʼbil ta patil, te Pablo jajch ta beel ta sbabial buelta ta xcholel te skʼop Diose. Ta xchebal buelta jokinot bael yuʼun te Timoteoe. Te Pablo sok te sjoʼtak ta beele bayal bintik tʼujbil kʼax ta skuxlejalik te kʼalal yakalik ta spasbeyel yaʼtel-a te Diose. Ta patil la yichʼ chukel ta Roma te Pabloe ta xchebal jaʼbil jil ta libre. Jaʼukmeto la schaʼyichʼ chukel ta patil sok la smilik. Jich yuʼun kʼaxem jtebuk ta 32 jaʼbil smakoj te SJUKEBAL PARTE ini.