Paglabay hin tulo ka adlaw tikang nga namatay hi Jesus, ginbanhaw hiya. Hito nga adlaw nagpakita hiya hin lima ka beses ha iba-iba nga higayon ha iya mga sumurunod. Padayon nga nagpakita hiya ha ira ha sulod hin 40 ka adlaw. Katapos, sinaka hi Jesus ha langit samtang nagkikita an iba han iya mga disipulo. Paglabay hin napulo ka adlaw iginbubo han Dios an baraan nga espiritu ha mga sumurunod ni Jesus nga naghuhulat ha Jerusalem.

Waray pag-iha katapos hito, ginpriso han mga kaaway han Dios an mga apostol, kondi ginpagawas hira han usa nga anghel. An disipulo nga hi Esteban ginbato han mga parakontra tubtob nga namatay. Kondi hibabaroan naton kon paonan-o ginpili ni Jesus an usa hini nga mga parakontra nga magin iya espesyal nga surugoon, ngan nagin hi apostol Pablo. Paglabay hin tulo ngan tunga ka tuig tikang nga namatay hi Jesus, ginsugo han Dios hi apostol Pedro nga sangyawan an diri-Judio nga hi Cornelio ngan an iya pamilya.

Paglabay hin mga 13 ka tuig, gintikangan ni Pablo an iya siyahan nga pagbyahe sugad nga misyonero. Ha iya ikaduha nga pagbyahe, gin-updan hiya ni Timoteo. Hibabaroan naton an damu nga makatirigamnan nga eksperyensya ha pag-alagad ha Dios ni Pablo ngan han iya mga kaupod ha pagbyahe. Katapos, ginpriso hi Pablo ha Roma. Paglabay hin duha ka tuig, ginpagawas hiya, kondi ginpriso utro ngan ginpatay. An mga panhitabo ha BAHIN 7 inabot hin mga 32 ka tuig.