Pali papite masiku gatatu ciwile Yesu, jwalakwe akwimuka ku ŵawe. Palisikuli akuwonecela kwa ŵakulijiganya ŵakwe kakwana kamsano pandaŵi syakulekanganalekangana. Yesu ŵajendelecele kuwonecela kwa jemanjaji kwa masiku 40. Kaneko, ŵakulijiganya ŵakwe ŵane ali mkulola, jwalakwe akwawula kwinani. Kaneko pali papite masiku 10, Mlungu ŵapelece msimu wakwe weswela kwa ŵakulijiganya ŵa Yesu ŵaŵaliji mkulindilila mu Yelusalemu.

Kaneko, acimmagongo ŵa Mlungu ŵawugalile ŵandumetumeŵa m’nyumba ja ukayidi, nambo lilayika lyakopwesye. Ŵakusisya ŵam’wuleje jwakulijiganya Sitefano mwakumponya maganga. Nambo citulijiganyesoni yayatendekwe Yesu paŵamsagulaga jwine mwa ŵandu ŵakusisyawo kuti aŵe jwakutumicila jwakwe jwakusosekwa mnope. Jwalakweju ŵaliji ndumetume Paulo. Kaneko, pali papite yaka yitatu ciwile Yesu, Mlungu ŵamtumisye ndumetume Petulo kukulalicila kwa mundu jwanganaŵa m’Yuda, Koneliyo, yimpepe ni liŵasa lyakwe.

Pali papite yaka 13, Paulo ŵatandite ulendo wakwe wandanda wakulalicila. Paulendo wakwe waŵili Timoteyo ŵaliji nawo yalumo. Citulijiganye yakusangalasya yejinji yaŵasimanaga nayo Paulo ni acimjakwe ŵaŵajendaga nawo pakutumicila Mlungu. Kumbesi kwakwe, Paulo ŵam’ŵisile m’nyumba ja ukayidi ku Loma. Pali papite yaka yitatu ŵamgopwele, nambo kanekosoni ŵam’ŵisile m’nyumba ja ukayidi, kaneko ŵam’wuleje. Yakutendekwa ya mu MBALI 7 yikujigala yaka ciŵandika 32.