MIDID 7
Dzú ni biás Jesús lad gueʼet hasta dzú ni Pablo goyoʼ press
Tzón govitz de goló goity Jesús, biásbu lad gueʼet. Dzúcu bireʼbu nisló xpiimbu gáay buelt. Né bunybu láani por 40 dzú. Laʼga tipnés buñ ni racanal láabu cabí rabiguetbu guibá. Chii govitz de goló góc ndeʼ, Dios bisiab fuers ni raquiimbu par gonybu ni nábu laidy guirá buñ ni racanal Jesús ni bian lainy gudx Jerusalén.
Diti xidzú de goló góc ndeʼ, xi enemig Dios bisalyibu xpiin Jesús press, per toib ángel bilaa layibu. Toib buñguieeu ni cuanal Jesús ni góc laa Esteban, buñ bigasguiee né bigaity láabu. Láaca guisuidyno que Jesús golú toib de layibu par gony xchiimbu ni rasac, né ndeʼ bidxin góc laa Pablo, ni góc toibtica xpiin Jesús. Tzón íz gorol de goló goity Jesús, Dios bixelbu Pedro par tze guiniʼ xtiitz Dios nisló Cornelio né xfamilybu, layibu diti gocyibu buñ judío.
Godudy yaaca trece íz, Pablo gosaló gosaa xidal gudx goní xtiitz Dios ni primer buelt. Ni rarop buelt goyebu, Timoteo buny compañer láabu. Pablo né guirá xcompañerbu gosacloyibu xidal cós ni radziguiaʼ buñ laʼga bunyibu xchiin Dios. Después Pablo goyoʼbu press lainy gudx Roma. Per ló chop íz ni goyoʼbu press bireʼbu, né diti xidzú biabbu press stoib né goyoʼ ni bigaity láabu. Midid GATZ rasaʼni 32 íz de historia.
LÓ MIDID REʼ
HISTORIA 102
Jesús nabany
Órni toib ángel rabeʼ toib guiee ni náaxh roʼ baʼ ro bigach Jesús, tipnés soldad ni cayap láabu radzuibygoluʼ né diti noʼ xi láabu ronyibu.
HISTORIA 105
Riaʼanyibu lainy gudx Jerusalén
¿Xigony Jesús rasiabbu espíritu santo laidy xpiimbu ló Pentecostés?
HISTORIA 106
Rareʼyibu press
Guirá buñ ni rasanir ló religión judío rasiegyibu xpiin Jesús par ma diti saayibu yoʼ por yoʼ, ór cú Dios rony toib galrradziguiaʼ.
HISTORIA 108
Ló néz ni sée Damasco
Toib guii ni rachep bisaló Saulo né toib rudx ni sieed de guibá ratzaʼ mod nabanybu.
HISTORIA 110
Timoteo ni racné Pablo
Timoteo rasiambu lidxbu né rony compañerbu a Pablo par guiniʼyibu xtiitz Dios.
HISTORIA 111
Toib mbiox ni gonás bacaʼal
Pablo goloʼ chop discurs ló primer discurs cú Eutico ranás bacaʼal láabu, per ló ni rarop discurs cú ma diti raisybu. Gueʼel cú góc toib galrradziguiaʼ.
HISTORIA 112
Ralaayibu ló toib isla
Órni bunyibu pensary que ma gaityibu, Pablo raiby layibu que diti guidzuibyibu portín goxin cú toib ángel xtuny Dios bieed ronoʼbu né góoch láabu que diti saityibu.
