¿KHITÏPACHAS aka warmixa uk yattati? ¿Uka pä jaqisti khitinakarakïpachasa? Uka warmix María Magdalenawa. Janqʼu isin jaqinakasti angelanakawa. Jesusax kawkin imatäkäntï uka sepulturaruw Mariax uñantaski, ¡ukampis Jesusax janiw ukankxänti! ¿Khitis apaspachäna? Yatxatañäni.

Jesusan jiwatapatxa, sacerdotenakaw Pilatomp parlir sarapxäna: ‘Jesusax kimsürut jaktanï sasaw säna. Sepulturar khitma. ¡Arkirinakapaw amay lunthatsusin jaktxataynaw sapxaspa!’ sasa. Ukat Pilatox soldadonak khitapxam sataynawa.

Ukampis Jesusan kimsür jiwatapatxa, wali alwat Jehová Diosan angelapax uñstäna. Ukat sepulturat jachʼa qal atiqäna. Soldadonakax walpun mulljasipxäna, janiw unxtirjamäpkänti. ¡Ukat sepultur uñantapxäna, janiw Jesusax ukankxänti! Yaqhip soldadonakax sacerdotenakar yatiyiriw sarapxäna. ¿Uka jan wali sacerdotenakax kamachapxänsa? Kʼarisipxañapatakiw qullqi churapxäna. Akham sasaw yatichapxäna: ‘Arkirinakapaw ikisipkayäta ukhax Jesusan amayap apasxapxatayna’ sasa.

Ukäñkamasti, Jesusan arkirinakapatxa mä qhawqha warminakaw sepultur uñantir jutapxäna. ¡Chʼusaki uñjasin sustjasipxänwa! Ukatxa María Magdalenaxa laqaw Pedrompir Juanampir yatiyir saräna. Ukat Mayakwa, kʼajkir isini pä angelanakax mayni warminakar uñstäna. ‘¿Kunatsa Jesusar akan thaqhapxta?’ sasaw jisktʼapxäna. ‘Jupax jaktxiwa. Jankʼaki sarapxam arkiri masinakamar yatiyanipxam’ sasa. Jupanakasti jankʼakiw tʼijupxäna. Ukampis thakinxa mä jaqiw saytʼayäna. ¿Khitïpachänsa? ¡Jesusänwa! ‘Arkirinakajar yatiyanipxam’ sänwa.

Ukat kunapachatï warminakax ‘Jesusaruw uñjapxta, jaktatäxiw’ sasa yatiyapxäna ukhaxa arkirinakapax janiw ukhamaspaw sapkänti. ¡Pedrompi Juanampisti sepulturaruw tʼijunipxäna, ukampis chʼusakïnwa! Ukat kunapachatï panipax sarxapxäna ukhaxa, María Magdalenaw qhiparäna, kunattix jupax kuttʼanirakitaynawa. Ukat sepulturaruw uñantäna ukatwa aka pä angelanakarux uñjäna.

¿Kunatsa Jesusan amayapax jan sepulturankxpachäna uk yattati? Diosaw chhaqtayäna, janiw Jesusarux pachpa janchipar jaktaykänti. Jan ukasti ajayjam jaktayäna, kunjamäpkitï angelanakax ukhama. Ukampis arkirinakapan uñjatäñatakixa, Jesusax jaqjamaw tuküna.