?HU YA woman ya mo hu ya tufala man ya? Woman ya i wan fren blong Jisas, nem blong hem Meri Magdala. Mo tufala man ya we tufala i werem waet klos, hemia tufala enjel. Smol rum ya we Meri i stap lukluk i go insaed long hem, hemia ples we oli bin putum dedbodi blong Jisas long hem. Hem i wan hol long ston. !Be naoia, bodi blong Jisas i no moa stap ya! ?Hu i tekemaot bodi ya? Bambae yumi luk.

Afta we Jisas i ded, ol pris oli talem long Paelet se: ‘Taem Jisas i stap laef yet, hem i stap talem se, biaen long tri dei, God bambae i mekem hem i laef bakegen. From samting ya, plis yu talem long ol man blong yu blong oli go lukaot gud long hol ya long ston. !I nogud ol man blong hem oli go tekemaot bodi blong hem long taem we ol man oli no luk olgeta, nao bambae oli talemaot long ol man, se hem i laef bakegen!’ Ale Paelet i talem long ol pris blong oli putum ol soldia oli stap gad long gref ya.

Be long namba tri dei afta we Jisas i ded, long eli moning, wan enjel blong Jeova i aot long heven, i kam, i rolemaot ston ya we i blokem hol. Ol gad oli fraet tumas, oli seksek we oli seksek, nao oli kam olsem dedman nomo. !Biaen, oli go lukluk insaed long hol long ston, be bodi blong Jisas i no moa stap! Ale, sam long ol soldia ya oli gobak long taon, oli talemaot samting ya long ol pris. ?Yu save wanem samting ol rabis pris ya oli mekem? Oli givim mane long ol soldia ya blong oli giaman. Oli se: ‘Yufala i mas talemaot long ol man se ol disaepol blong Jisas oli kam long naet, oli karemaot bodi blong hem taem we yumi stap slip, nao oli tekem i go.’

Taem ol samting ya i stap hapen, sam woman we oli fren blong Jisas, oli go long gref blong hem. !Oli sapraes tumas taem oli luk we gref i emti! Wantaem nomo, tu enjel i kamtru, we klos blong tufala i saen we i saen. Tufala i askem long ol woman se: ‘?From wanem yufala i stap lukaot Jisas long ples ya? Hem i laef bakegen finis. Yufala i go kwik, yufala i talemaot long ol disaepol blong hem.’ !Ol woman ya oli resis blong go talemaot nius ya long ol man blong Jisas! Be long rod, wan man i blokem olgeta. ?Yu save hu ya man ya? !Yes, hemia Jisas! Hem i talem long olgeta se: ‘Yufala i go talemaot nius ya long ol disaepol blong mi.’

Taem ol woman ya oli talem long ol disaepol blong Jisas se Jisas i laef bakegen mo se oli luk hem finis, ol disaepol ya oli ting se ol woman oli stap giaman. Ale Pita mo Jon, tufala i aot, tufala i resis i go blong luk hol ya. Be tufala i luk we hol ya i emti i stap. Nao tufala i gobak bakegen long ples blong tufala. Be Meri Magdala i stap stanap afsaed long hol ya. Long taem ya nao, hem i bendaon, i lukluk i go insaed, nao i luk tufala enjel i stap.

>?Yu yu save wanem i hapen long bodi blong Jisas? God i mekem se bodi ya i lus. Taem Jisas i laef bakegen, hem i no gat semfala bodi we hem i ded long hem, nogat. God i givim wan niufala bodi long Jisas, wan spirit bodi olsem ol enjel long heven oli gat. Be Jisas i wantem soemaot long ol disaepol blong hem se hem i laef bakegen. Blong mekem samting ya, hem i putum wan bodi we ol man oli save luk. Bambae yumi tokbaot samting ya long nekis stori.

Matiu 27:62-66; 28:1-15; Luk 24:1-12; Jon 20:1-12.